للشاعر بن خريص وجه ندانا=نبيه يفتح للمناظيم هنداب
لعل ابو ماجد يحقق رضانا=ودي يعزيني ترى القلب منصاب
غابت نجومٍ لامعه في سمانا=والباقي الله والنجم لو طلع غاب
وحنا بغيبتهم تكدر صفانا=والموت حق ولاعن الموت مجناب
يالله ترحمنا وتجبر عزانا=يالواحد المعبود يارب الأرباب
وتعوضنا بأبطالنا وعضدانا=اللي لهم بالمجتمع قدر وحساب
اللي مهابتهم تزعزع عدانا=لاجات زله من مزاهيف الاجناب
سيوفنا القطع ذخيرة حمانا=نردع بها المخطي ونمنع بها أرقاب
ضد الخصيم المعتدي لاغزانا=ولا فيه داعي للأسامي والألقاب
واليا انطلق غوجٍ بظلمه دهانا= نادوه في جابه عليها نسم داب
جوابهم لأهل النفوس الحزانا=سم يخج القلب ويشل الأعصاب
غابوا عن الدنيا وحنا ترانا=تهزنا العبره على فقد الأحباب
وشعارنا الحيين فيهم رجانا=الله يكافيهم صواديف الأنشاب
هم درعنا الوافي ومقضب عصانا=دون القبيلة لاحصل حزم كلاب
لامن تفاق المعادي رمانا=غزوا له الرايه على رأس مرقاب
وإن هازنا خصمٍ عنيد وبلانا=هدو قساه اللي يهدون الأصعاب
وحنا الوفا فينا ونثبت وفانا=وافين بحقوق القبيلة والأجناب
وثايق التاريخ تثبت نقانا= على الشرف وإسنادنا قفش وحراب
وعن كلمة الناقد نشيم لحانا=نافي ونوفي مع نزيهين الأشناب
وبالشعر منهاج الحقايق لغانا=لاصار بالشعار صادق وكذاب
وليا إنفتح باب العيا والمشانا=على الخصوم الطايشه نقفل الباب

يابدر بن عواد قافك لفانا=ناديت عبدالله وعبدالله أجاب
يالله يالمعبود يالله عسانا=نكسب رضا بدر الحويفي بالاعجاب
شاعر حكيم ومن خيار إرفقانا= استادنا المبدع على زين الاداب
شاعر خدم شعر النبط ماتوانا= اثبت وجوده بين راوي وكتاب
شاعر علم سيفٍ يضد إضددانا=يحسب إحسابه بالقبيلة وينهاب
يسنا ولا يصعب عليه المسانا=مد وجزر بحره له إذهاب وياب
يقيس ببحور المعاني مدانا=وش عند قبطان السفينه من إزهاب
أعلن رثاه وشاد يطلب رثانا=ويقول عزوني على فقد الأصحاب
اللي مواقفهم تضد أخصمانا=بالماقف اللي للرياجيل غصاب
ذكرت سته من كبار شعرانا=اللي شذاهم للعدا حر تيزاب
سبيل كساب الرهن بالمثانا=اللي خزم خشم الجمل شامخ الناب
وبن صخيبر والعسيلي حتانا=بنقض وفتل معنا لواليس الأنشاب
وأذكر رجاءالله والعجي بفقدانا=بالملعبه ننطح بهم كل لعاب
وهواش لاطال العيا والمعانا=له كلمةٍ يبلش بها الخصم لوتاب
راحو وباقي يالحويفي سرانا=كل الجماعة مع هاك الدرب هراب
الموت يابدر الحويفي ورانا=تذكر النومه تحت لجف سرداب
سبحان عالم موتنا ومحيانا=الوقت يمضي وآخر الوقت نكاب
نرثي ونِرثى يالله المستعانا=من جاه يومه مات ماتفيد الأطباب
اما رثينا العود ولا رثانا=الموت يقضع قلة العود والشاب
يغيب نجم وبه نجومٍ تبانا=نجم وراه انجوم يابدر ماغاب
شفنا نجوم وبه نجوم اتخفانا=لدار وراثه ولنار شباب
نسمع مثل يروى قديم الزمانا=مامات من خلف من أصلابه أنجاب
كان المثل هذا صحيح الضمانا= هواش ماجد وأحمر العين ثلاب
وصبر ويبدو لك حسلس اشرابنا=بسوق يروج سلعته كل جلاب
نارث ومنا يارثون احفدانا= يطلع مثل عنتر وإبو زيد وذياب