شوقتني يامير خالد للاشعار=زودٍ على الأخلاق شعرك حقيقي
لايابعد من لوثوا بث الاقمار=لين احتملنا فوق ما لانطيقي
ولاانت نورك نور وبوالدك بار=كنك لوجدان الوفى اخوٍ شقيقي
وشعرٍ بدون جرورح واحساس وايثار=لو قيل ما ناسب طريقه طريقي
كن العنى مع خافقي طالبٍ ثار=جرعني العلقم بكاسٍ دهيقي
شربت نقع الحب من كاس الامرار=وازريت من سكرات حبه لافيقي
المهره اللي عجزت قحص الامهار=في رونقة غصن العفاف الوريقي
لو بس لدت للبشر بعض الانظار=ما استكثروا همي وحزني وضيقي
ليت الأمير اللي عشق شبة النار=من فيض جوده في ضميري يويقي
ويواسي احزاني بعذبات الافكار=وارتاح من شرهة عدو وصديقي

أنا احمد الله واشكره سر وجهار =اللي على خلقه حليم وشفيقي
رازق جميع الخلق مسلم وكفّار =بابه وسيع وباب غيره يضيقي
الشعر وِهْبَه والوهايب لها اسرار =عند الحكيم.. ومال فضله عويقي
لاهوب لا ظالم ولا هوب محتار =ما يشتهيه يصير.. هرجٍ وثيقي
حنّا عبيده نطلبه ليل واسحار =يضفي علينا نعمته يا رفيقي
عزي لمن هو دالهٍ عنه ما ذار =من ما قفٍ فيه الخلايق رهيقي
كلٍ وقلبه سَدْ حلقه والابصار =تشخص.. ومن فيض المعارق غريقي
هذا وعندي يا علي لجلك اخبار =من دون ما أفتش ضميرك واويقي
العشق موت وذاكرينه بالاخطار =راح الدجيما فوتٍ هو والحريقي
والحب له لَذَّه ولو كان جَبَّار =مَرَّه نعيمٍ ومَرْ سمٍ عتيقي
واليوم خلك يابن الاجواد صبَّار =كم صايد صادوه قبلك وسيقي
والريم من طبعه من الناس ذيَّار =لاشك قلبه لو تقسَّى رقيقي
هذا وانا لك يا علي سيف بَتَّار =وان كانها بالوجه وجهي طليقي