كلمه و كن الجرح يعزف ونيني = نغمه تعانق لحظة الصمت بأحزان
صوته ينادي و ألتفت و هو فيني = واقع خيال أو هي تخاريف ولهان
جالس و أشوفه في مكاني يجيني = و أنده وأنادي بعالي الصوت يافلان
و لا جيت أبهرب منه غمضت عيني = و المشكله منقوش رسمه بالاجفان
أسج و انسى كيف و هي تحتويني = دام المشاعر طفل صارت له أحضان
حبه مثل عمرٍ مداده سنيني = لا من وقف ذكراه تسري بالازمان
شفت الفلك كله أنا وسط عيني = مدامك انتي ساكنه وسط الاعيان
وبيني و بين الموت هالخطوتيني = إما إجزمي و إلا إصرفي جيش الأحزان
مليت أكون بخاطرك فكرتيني = عيشي الهوى و الا على طول إخوان
ما هو بكيفك يالغلا تقسميني = ما زلت أنا روح و مشاعر للإنسان
بيني و بينك ألف فرصه تجيني = أرفض و أقاوم دامني فيك هيمان
غرقان في بحر الهوى و إفهميني = إما إغرقي و إلا إرحلي كيف ما كان
اخاف أكون بخاطرك دمعتيني = و أخاف أموت و خاطري منك شقيان
في خافقك منهو أنا جاوبيني = راضي و لو قلتي بالإحساس غلطان