على مقباس نار الشوق سريت القوافي فوق
نظمت احلى بيوت الشعر في عالي مراقيها
تخيرت الجزيل من البيوت وطيب المنطوق
تجمل راعي الجزلات كاتبها وقاريها
وانا طبعي كذا دايم حريص ابحث عن أهل الذوق
لو انه صعب كل انفوس من يسمعك ترضيها
لكن اللي يبا سعر الذهب يدخل بجوف السوق
قديم يقال ماقاسا المهمه كود راعيها
ومن يشتاق شي ويقترب منه يزيده شوق
ولا ابعد عن عيونه يمكن الآهات يخفيها
ولو كل الذي يطرد على قول العرب ملحوق نقول الشاردات اللي يسرحها يضويها
وانا اللي طول عمري حافظ الأسرار في صندوق
ولا بينتها الا عند من يفهم معانيها
ومالي في معاتبة الذي مايستمع لي طوق
ابعرض له نصيحه شالها والا يخليها
صحيح انسان مومن بالفروق وفيه جل فروق
اصابع يدك ماتاتي سوى سبحان باريها
اخذت من العنب حبه وقطفت من الزهر زملوق
وشفت الفرق واضح بين باديها وثانيها