قصيدة : الشاعر /
*فواز بن محسن بن لاحق الزويهري الذروي الحربي*

في حفل الشيخ محمد بن غالي الذروي الحربي

*لشيوخ وأعيان قبيلة حرب*

بكلية يوم الجمعة 1438/4/15

〰〰〰〰〰〰〰〰


انتهض للقاف هاجوس حماسي
مثل حر يكفخ طيور الحباره

ما يصيد الا النوادر له قياسي
في موار الصيد يا صعب اختياره

عند صقاره له الوضع الرياسي
لجل دايم والدسم من فوق ناره

ياسلام الله سلام يشوش راسي
في محل الطيب ورجال الصداره

للعموم يعم ولا يحجب لناسي
مثل ثعل الغيث في غزر انهماره

سال سيله بالوفا دون احتباسي
يروي قلوب البشر صدق العباره

والجميل لراعي المحفل لباسي
ابن غالي وأنعم برجل الاماره

شيخ وابن شيوخ مثل طويق راسي
زبن منهو فالزمن ضاق بزراره

فالمواقف يروي العرق اليباسي
فعل يده ردت العود لخضاره

ربعه الشامات صعبين المراسي
عزوة الذروي على الطالة منارة

الذرا لا جاك للهيا اقتباسي
يكسرون المعتدي في كل غاره

صيتهم معروف ما فيه التباسي
زود طيب ومجد مع زود النعارة

منسبي لن قلت ذروي فخر ساسي
ربعي زويهر أشاويس النماره

في يمن ولا في شام يدك باسي
أسأل التاريخ واستفسر نهاره

نبني قصور الصخر والوقت قاسي
كيف واليوم الرخا عز إزدهاره

فعل حربي ما يجي فيه اختلاسي
مثل صرف النقد في بنك التجاره

حرب وإن جا ذكرهم يرتز راسي
فكو رقاب البشر جود و سطاره

الثلاث المعجزات إلها كواسي
كاسيات الطيب برجال الجساره

وقبل لا اختم ما ني لجبران ناسي
الشجيع اللي تفدا لامن داره

ليث في وثبته للإرهاب خاسي
مردي الخفاش لبسه الحقاره

الوطن هذا يضد الانتكاسي
دام توحيد المعظم هو شعاره

🌿🌿🌿🌿🌿🌿🌿