مثلت ربعك ياجودي عز تمثيل=يانجم طالع في قبيلة عتيبه
تكميل ياولد الشيابين تكميل=ماتدخلك يانمر شكه وريبه
انا اشهد انك من قروم الرياجيل=اللي لهم بالطيب جاهن وهيبه
ياناصي الخطار بحسن المقابيل=الوجه طلق وبالصدور الرحيبه
يوم المواقف مارسلت المراسيل=سقت القدم معنا على كل طيبه
وﻻهي غريبه من رجال ن حلاحيل=اهل اللوازم ماتعرف الصعيبه
انت ياعبدالله عن العز ماتميل=من روس قوم ن يكسبون الكسيبه
مهما ذكرنا من مزاياك فالقيل=اللي كماكم غير ربي يثيبه
الرد من اخي عبدالله سعود الشيباني العتيبي=
عداد ماهلت حقوق المخاييل=وعداد من صلى بمكه وطيبه
يامرحبا ترحيب مايدخله ميل=والذ من حلو الشراب الشريبه
باللي علي ارسل وساغ التماثيل=من روس قوم ماتعرف الغليبه
اهل الوفاء والطيب من سابق الجيل=هاذي عوايدكم ولاهي عجيبه
والشيخ ابو حمدان حامد لياقيل= من طيب راسه كل قاسي يجيبه
مع الخوي والجار ماينقص الكيل= ويشيل حملن ماتشيله كتيبه
والعود الأزرق والصواني ملي حيل=لا الضيف والعاني ولاهي تعيبه
وأقبل تحياتي عدد مابدا ليل = وصلو على المختار محمد حبيبه