الناس خافوا من حليب المصاغير= وحليبها يبري عن الكبد عله
ما احلا لبن عوانهن والاباكير= اليا عطفن ونفوسهن مسمهله
وان روحن من حاجرٍ به نواوير=عشبٍ جديدٍ والروايح تعله
وترى الحذر ماقط رد المقادير=وجميع ماصاب الفتى في سجله
وتكفون والله يالرجال المناعير=لاترخصون الذود دقه وجله
لاتصدقون اهل الفتن والتزاوير=مروجين الهرج من دون ادله
البل عطايا الله بوقت المعاسير=حليبها يغني عن الزاد كله
والبل تراها ماتبي زود تفسير=اللي عقرها ياعرب وش حصله
ويالله ياللي تدفع الشر بالخير=ياعالمٍ بالغيب والكون كله
نطلبك يارزاق عكف المناقير=نطلبك ياللي كل كربٍ تحله
نطلبك يالمعبود مانطلب الغير=نطلبك يارب النجوم المطله
تسق الديار اللي مطرها المعاصير=افزع لها في ناوتٍ مستهله
حتى تربع خلفها والمعاشير=والبدو كلٍ يهتني في محله
وصلاة ربي عد ما غرد الطير=على نبيٍ ملته خير مله