سلام ما يرزم مع المزن رعاد****وسلام ما ذعذع نسيم البرادي

على الرجال اللي على الطيب تعتاد****ذخر الزمان وفخرها بالبلادي

روؤس الرجال اللي يجيبون الامجاد****اهل الفخر بالحاضرة والبوادي

بير الحقائق ساقيه كل وراد****ويبقي سؤال الناس للناس عادي

وهذا جواب اللي مع الناس نشاد****وجهة نظر اعطيه حسب اجتهادي

خذ الجواب اللي على روؤس الاشهاد****مثلي يدل اللي عن الدرب غادي

وان كانها هرج وسواليف نقاد****نزهت نفسي عن كثير الدوادي

وان كانها بالطيب مع سلم الاجواد****أنا احمد الله مركزي به ريادي

من ماكر الاحرار والطيب لي زاد****والحر مثلي ما يصيد الجرادي

بذروة سنام الطيب وبالطيب نزداد****ويبقي الوفا هو عدتي مع عتادي

وان جيتنا بالطيب بالطيب معتاد****اعطيك من حالي ومالي وزادي

وان كان تبغاها تحدي مع عناد****أنا لها لا طال حبل العنادي

عمر الجمل مامات من عضة قراد****وعمر الهبايب ماتشيل الجوادي

الله فرق بين المخاليق وعباد****والفرق واضح بين حي وجمادي

والعبد يسعى ويفعل الله ماراد****والعمر يمضي والليالي اجدادي