الوقت جاير فالليالي والأيام = يقسى ولينه ماخفى عند يسره
فيه الظروف مسيطرة حسب الاحكام = يبان مافيها بقله وكثره
ماينتهي ماده بنا يوم قدام = تطعم سنين العمر يسره وعسره
والمقبلة يالآدمي غيب علام = سبحانه العالم بخيره وشره
ياحظ من صلى ويابخت من صام = ماعاش لاضايع ولاضاع عمره
يالله مسلم من عبادك فالاسلام = رجاك يالمولى ولك فوض امره
حمله ثقيل وكله ذنوب وآثام = عالم بها لو تجهل الناس سره
دنياه بين الآم واحزان واسقام = لو الفرح فيها يجيه ويمره
ينام لو يصحى ويصحى ليا نام = عسى الامل له فالمقابيل جره
يتبع أثرها لو قعد بعد ماقام = وربه يحقق مابغاه ويسره
هذا الزمن فيه الفشك ماله حزام = والعزم راسه مالقي من يفره
دام العرب فخداع 0 ونزاع 0 وازحام = مابينهم نفعه تعداه ضره
يكفي من الايام ماحل بالشام = والطاغية يفرض على الكل جبره
أُمة تعيش الذل عامٍ بعد عام = يالله يالمعبود عجل بنصره
زلزل عليه الارض من تحت الاقدام = وشر الهزيمة جعلها تشل فكره
هذي هجوس يخطها حبر الاقلام = فيها المشاعر والاحاسيس حره