بسم الله الرحمن الرحيم
( يا كارهين البنت)
يا كارهين البنت ما هيب بمـكروه=هي وردة البيت وشذى ياسميـنه
البنت يوم ان الولد يتــرك ابوه=علمن صحيح وكلكم خابرينه
نادت بعال الصوت وتقول جيبوه=يا ويلكم بالويل يـا تاركينه
كنك تعاين بأمـرها حين وطوه=وقامت تحوفه من يسـار ويمينه
تمشي على ما قال ودوه هاتوه=اتنفذ امره ثم تقبل جبينه
كان الولد ما يلحقه من مشروه=وش هي حياته خيــب الله يدينه
ليا جاء مجاله قيل هبوه هبوه=الخايب اللي ما نفـع والدينه
يقول هذا للـمسنين ودوه=من كل ما يحتاج متكفلينه
اليا دخلتم داخل البـاب خلوه=ارعايته بيديـن مستقبلينه
ابوه ون وقال مع ونته يوه=سمع الكلام وغوزرت دمعتيـنه
رفع يديه وقال قـولوه قولوه=قولوا عليه امين يا سامعينه
الي يحط ابوه فـي وصف مبلوه=جعله عقيم ما يـدرج جنينه
والا ان رزقه الله ولـد يجي مشبوه=يذوق منه اللايمه و الغبيـنه
حتى يذوق الي اهـله منه ذاقوه=ياخذ جزاء سيئات فعــله بحينه
في صغرته كنا نناديه يـا هوه=نتعب لأجل يرتاح ومدلعينه
وإن غبت عنه أسرح مع الفكر وأتوه=ولا أبي يحول الليل بيني وبيـنه
كنت ارحمه واليا بكاء اقول راضوه=خلوه ياخذ ما تورا بعيـــنه
وان جيت من طرقت سفر قلت نادوه=اول ما انشد عنه واقول وينه
ارفع لحافه عنه واقول عشوه=اليا بطشت بكل كومن سميـنه
واليوم خلاني تقل وصف مسفـوه=حتى التعب ما رد لي لو ثمينه