قصة عذابٍ سطرتها حروفي=لو سطرت بكتاب راس القلم ذاب
يذوب مما شاف رهبه وخوفي = فيها من الالآم مايولف. كتاب
كتاب عنوانه قساوة ظروفي=اصغر مصايبها على قلب منصاب
صم الصخر لوشافها في يروفي=كنا وكان الوقت في لحظة اغياب
جينا زيارة ياإلهي تروفي=بمشي ولالي في مسيري من اسباب
حار القدم ودموع عيني ذروفي=اخاف وارجي واتخوف من اخطاب
خوفي لونه لحظة افراق خوفي=والعين تسبقني على فتحة الباب
بين الرجاء والياس تاقف اشفوفي=وشفت الطبيب بنظرته حكي مرتاب
وقفت مادري ماشعرت بوقوفي=تمتم بكلماتٍ مثل ضرب الاحداب
كن الخناجر ترتكز وسط جوفي=قال الوداع الحي عن دنيتك غاب
قلت الوداع اللي مهو بمخلوفي=قال ايه مالك حكم من رب الارباب
امرٍ مضى لله بحكمه صروفي=وضاق الفضاء والدمع للعين سكاب
يالوف قلبي عقب فرقاه لوفي=كن الجسد يسري به السم من ناب
صلٍ سقى جسمي بسمٍ ذعوفي=غادروخلاني غريبة مع اغراب
كني لحالي لو حولي اولوفي=اغراب كل الناس لو كانو اقراب
حبل الرجاء ماجودنه اكفوفي=والدمع غطا للمحاجر والاهداب.
اضحى خفوقي للهموم معسوفي=من وين مالقيت في هم لهاب
يا لله بحالي ياإلهي تروفي=لطفك بنا ياعلمٍ غيب الاسباب