والله إني كل ماهبت هبوب ٍ صلفه = قلت ياعالم خفايا الخافيه سكنها
ولايمد الكف من هو ماوثق من كفه = والشجيع يمدها لروس مايطمنها
لاضرب يوجع وتاتي ضربته ملتفه= فالوجيه العايله ضرباته يمكّنها
شفت من تزرق ارماحه ثم تضرب شلفه = وشفت من وده ولاكن ماهو بضامنها
والاوادم دايم ٍ مهما حصل مختلفه = وكل واحد وده إنه بالحياه احسنها
ومن تسبب بالبدايه ثم ناظر خلفه = لايقدمها عيان ويمشي ويركنها
الزمن ماهو زمان الطارفه والطرفه = دام ماهو قدها وش حده يدندنها
شرهة اهل العرف والمعروف واهل الحرّفه = تاصله مادام يدري فاهم ومتقنها
كان مايتقن ولايفهم معاني حرفه = لايدندنها العصير وليل ٍ يلحنها
عذر ابو نواس مايدخل براس الترفه = يارجال ٍ كل سلعه تقدر اتثمنها
يعلن إنه عاجز ويبقاء بداخل غرفه = والجنايز به ارجال ٍ تقدر اتكفنها
طال صمت الصامت الي ماجهل بالصرّفه = سبت الي قالها كلمه تقل خمّنها
وبعد مسّ الحبل قفاء ماعرفنا ضرفه = لايثبتها ثبات ولاهو براكنها
والحقايق بينّه والكل حسبت عرفه = والنفوس تشين لاكن ليه من شينها
بيض الله وجه من ضد الهبوب الصلفه = وسود الله وجه من شانت ولازينها