إخواني الأعزاء أطرح بين أيديكم
هذه الزهورات والخواطر من كسراتي الخاصه
وهي للأطلاع فقط
أتمنى أن تنول إستحسان الجميع
( 1 )
طرفي عليه الآسى موقوف=وما أشوف مِن كان قدّامي
يصحاب مِن يصنَع المعروف=ويرُد شوفي مِن أخصامي
( 2 )
بي جرح في حال ماتَرضاه=ياللي بجرح القلوب أدرا
لا قِلت لك آه تِلوْ الآه=لا تشوف نَفسك وتِتمغرا
( 3 )
المنطَّق العذب مِتناقِـل=زيزَوم فالسَهل والضِّلعان
راعي العقِل يلتِقي عاقِـل=واللي تجنّن يشوف جنْان
( 4 )
محدِّن على قِسمتُه مسبوق=والرازِق الله عظيم الشـان
لو كان رِزقك على المخلوق=تقضي سنين العُمر جيعـان
( 5 )
أهديت لك قلب ميت فيك=عليه قطر المحبّه فـات
والأن ماثِل مابين إيدْيًك=يجوز يحيآ بعد مامـات
( 6 )
عِشنا وشِفنا ومْل الشوف=مِن كُثر ماشاف وإستَنَكر
أقولها والمثل معـروف=إن عِشت أكثر تِشوف أكثر
( 7 )
أحِّب طيبَتك وجنونك=ياللي تحِب الغرام جنوون
وماأتخَيَل الكون مِن دونك=لو ملَكوني كنوز الكون
( 8 )
مادِمت تَسعى على خدَاعي =وِأصبَحت مكّار وِمخَادع
خلاص ماعاد لك داعي=ولا تلومني في حُكُم رادِع
( 9 )
يامـن تميّـزت بأخـلاقـك=وأصبحت سُلطه على العُشاق
مايهِمّنـي كُثـر عُشـاقـك=يكفيني إنـك معـايا أخـلاق
( 10 )
حنّيت لُه والهوى ضِدي=وماغير دمعي عليّا حْن
أستحَسِن القُرب مِن ودي=وأحِّسْ نار البُعاد أحسْـن
( 11 )
لي قلب يصعب عليه الشرح=بين الهوى وإنكسار الروح
دايـر يـدوِّر دُوا للجَـرح=واللي جَرح خاطرُه مجروح
( 12 )
كُل ماآشرقت للسعاده شمس=مابيـن روحـي و ناهِبهـا
ليلي يجدَّد جـروح الأمـس=ويرقص على نـار لاهِبهـا
( 13 )
لو الصراحه تزَعِّـل نـاس=بأقولَهـا وأكسَـب الراحـه
مِنهو رِضي يكسب النوماس=ومِن ضاق يشرب مِن الباحه
( 14 )
سلّمت قلبي جبا للـوِد=في ظِل مكرُه وملعوبُه
لكِن غرورُه وحُب العِّند=أنسـاه وِدُه لمحبوبُـه
( 15 )
الطيب ماهو سهم فالسوق=يطلع وينزِّل على الشاشَه
الطيب دايم مِكانُه فـوق=وماينزِّل قلوب غشاشَـه
( 16 )
لا تلومِني في دموع العين=اللي لشوفتـك تَسبُقنـي
لإن نار الهـوى ناريـن=لهيبهـا فيـك يحرِقنـي
( 17 )
ماأبغـاك تتذكَـر أحزانـي=وماأبغاك تذكُر جروحي ذيك
سعادتـي يـوم تنسـانـي=وتزيد شوقي وأفكِّـر فيـك
( 18 )
نسمة هوى روح أحيّت روح=وإسترسلتهـا لشاطيـهـا
كل ماآساها عذاب جـروح=أحيّت نسيـم الأمـل فيهـا
( 19 )
أهل الصفا همها توفيـه=ولاهمها زيْد وألآ عبيَـد
وفي ناس توطآه وتوّطِّّيه=وناسِآ تعَلِّيه لأعْلى حيـد
( 20 )
حدَّد مكان الوصِّل وآجيك=ولاتطري البُعد والأسقـام
أنا تفَرّغت لجل أرضيك=أصْل الرِضا سيَّد الأحكام
( 21 )
أصحابنا وِدُهُـم شاسِـع=دايم على جُل مقصـودي
ولجل إتّساع الفضا واسِع =أخاف تَبعِد عـن حـدودي
(22)
تخَّيَل إنـك حبيـب القلـب=وعُمرك مقرِّب على الخمسين
بالله تسلِب غرامـي سَلـب=وألآ تطشُـه بحـر قزويـن
( 23 )
إرفِقْ بروحك وعذِّبني=وإرسِل عليا آشّد عقاب
لاتسيب قلبك يذوِبنـي=ويرُّدنا من جديد أحباب
( 24 )
وآآآ طرفي اللي خلَد للنـوم=لحظة نسيم الغرام المـار
بيسوم قلب المعنْى سـوم=والليل فارِض عليه إحصار
( 25 )
الشِعر حِكمْه وفيه إقضاه=بالعِرف والفن والإبداع
لو كان حْسَب النَسب والجاه=كان أصبَح الشِعر فرد إذراع
( 26 )
خاتمه
مابين صاحِب وصاحِب فرق=مايجتِمع غير في الأسمـاء
صاحِب سواة الرعَد والبَرق=وصاحِب مايسقيك شربة ماء
تحياتي وأشواقي
أخوكم
ماجد بن عبدالله بن مفرج الجدعاني