الله مـن قلـب هجـوسـه تمـلـه=مـل الغضـا لمبهـرات المباهـيـر
وشوف البراري والفضا ولعـة لـه=لاشفـت بالمنشـا مـزون مزابيـر
ياموتـري ريحتـك القيـض كلـه=أبيـك لاقامـت تطـول المشاويـر
لابـد لـك لابـرد الـوقـت تـلـه=يحن ماطورك علـى ساقـة الطيـر
في ماقـع بعـض العـرب مايدلـه=مدهـل لفتخـان الرجـال المناعيـر
نبـي لنـا معهـم وناسـه وفـلـه=مع درب مسهاج الوسـوم المباكيـر
ليا اصبحت روس النـوازي مطلـه=عقب الجليد نكسـر الثلـج تكسيـر
ثم اصبح القرناس من عقـب طلـه=يوجس بجلـده مثـل دق المساميـر
واستطلعـوا خطـو أشقرعـادة لـه=حرش الكفوف يمزر الخرب تمزيـر
والبارحه حل المساء قد حصـل لـه=عشاء خفيف من ابرق الريش تنسير
لافرعـوه وشافهـن وأدرجـن لـه=وأدلج وراع الجمس كفه على القيـر
وتضايقن عقب الفضا وأحضرن لـه=وسلط على وحـده وذلـك مخاميـر
وليا المشبـب عندهـم مزهـب لـه=با اللي ندبها طيـر الريـش تطييـر
والخـرب طقـه ماتعـدى محـلـه=والثالثـه فـزت ولا عينـت خيـر
بطيارهاشفـنـا غـيـاره وخـلـه=زمـت وحولهـا ولـي المقـاديـر
أعلق بها اللي عوقهن سهمـة لـه=شيهان عـوق ملوعـات المعاشيـر
ملموم مثل الصـول طولـه وجلـه=أجرد يصخر شرد البـرق تصخيـر
وكل ركـض للـي بوجهـه يشلـه=تزارقوهـن بالـحـدود البواتـيـر
اكبودهـم عقـب القرايـا مغـلـه=تسع الشهور نقزر الوقـت تقزيـر
وركبوا وقالوا تبـع الجمـس ظلـه=لا ما نقول أوقف كفيـت العواثيـر
نبـي لنـا خـد مهـامـل امـزلـه=مادوجـت فيهـا الغنـم والمظاهيـر
تلقـى بهـا زرق المعـارف محلـه=بيض الدواغـر متعبـات المداويـر
هذا هوى اللي قـزر القيـض كلـه=ماشاف غيـر القوبعـه والعصافيـر