من على مرقـاب يمعـن بالنظـر=لـه سهـامٍ مالهـا أبـدًا مثـيـل
شوف عينـي يافـعٍ يسبـر سبـر=كامل الأوصاف نقّـاض الجديـل
جامـحٍ كالصيـد رقـاي الوعـر=هايـمٍ مستشـرفٍ عـوده نحيـل
فاطـنٍ مستنبـهٍ حــذرٍ فــرر=مرْ خايف من مثـل قالـوا وقيـل
مايبـي أهـل المـدن والمستـقـر=عشقـه البـرّان والشـفّ العليـل
من وصوفه كنـه الظبـي العفـر=لا بدا لـه زول أصخـر بالجفيـل
درةٍ مكنـونـهـا كــلــه در=رلفّها ثـوبٍ طـرازه مـن خميـل
مايشابـهـا ولا نــور القـمـر=لا ظهر بين السحايب وقـت ليـل
مالها توصيف مـن بيـن البشـر=كاحلة بالزيـن والطّـرف الكحيـل
ترقب القناص فـي لمـح البصـر=والهـدب لجفونهـا ظـلٍّ ظلـيـل
صيرميـة بنـت شيـخٍ لـه قـدر=رزّةٍ بالطـول والشعـر الطويـل
أجوديـة مـع تباشـيـر الفـجـر=نجرها تسمـع دنينـه لـه وليـل
بدويـة ماتحـب طبـع الحضـر=نرجسيّـة مـا تعـرف المستحيـل
تستثيـر الوجـد بابيـات الشعـر=كـل يـوم الهـا جريـحٍ أو قتيـل
تستجـم بريحـة أزهـار المطـر=تعزف لحون الِحدا من عـذب قيـل
الطيور صفوف مع بنـت المطـر=تستمـع للقـول واللحـن الجميـل
كل ما مرّت على غصـنٍ خضـر=هاضت الأغصان تطلبهـا المقيـل
لو وطت باقدامهـا جـدبٍ زهـر=لو تناظـر للسّمـا تخجـل سهيـل
لو تغيب الشمس فـي ليـلٍ ظهـر=نورها يطغى علـى الليـل المِهيـل
لو يديها لامسـت سطـح الصخـر=ذابت الصّخـرة وحنّـت للمسيـل
تستشـف الـود وتصـده قـهـر=ليـن يرجـع مـن تخيلهـا ذليـل
كل مـا غضيّـت طرفـي اعتـذر=قال مقـدر كـان تقـدر يابخيـل
جيت أسولف كـل مافينـي خـدر=خاننـي التعبيـر ولسانـي ثقيـل
لو حصرت وصوفها وأبغى اختصر=ضاع توصيفي وضيّعت الحصيـل