يانجر ياللي للتراحيب ضروك = مدك يجي للضيف في كل ساعة
قبل القرا للضيف يانجر بدوك= انت المبدا والشحم لك تباعة
يانجر لامن الخطاطير سمعوك= ارهو على بيت الوفا والسباعة
يانجر ياللي للمناداة دقوك = لابان صوتك لم كل الجماعة
يانجر فالمجلس هل الجود حطوك = ما حلاك في بيت الكرم والشجاعة
يانجر يوم ان الرجاجيل عزوك= الليل كله ماتعرف الهجاعة
باغلى ثمن يانجر تعبوا وجابوك= لوكان تلحقهم بخوص ومجاعة
يانجر يوم الناس فالبيت رزوك= واللي صنع وانشاك وقت الصناعة
يانجر هم للبن والهيل ربوك = في غيرها يانجر مالك طماعة
واليوم ذا يانجر منسي ومتروك= واين انت عن مجلس منفح شراعه
يانجر ليش اهل المروات خلوك= وين المعاني وين ذيك الولاعة
اليوم عن ذيك الدهاليز دسوك = للنجر والمحماس جات انقطاعة
يانجر قلي واين الاجواد ودوك=وانت في دق البن عندك براعة
يانجر بالله من ردى يوم خلوك = واللا رجال الكيف جتهم قناعة
للدلة الرسلان جاا بن مشكوك = في مصدره مدري من اية بضاعة
مطحون ومحرق وفالكيس مدكوك= له وقت جاهز في محل البياعة
ماهو بحمس مصلح الكيف مبروك=اللي لدق النجر طالت ذراعه
يانجر بعد الناس صدوا وكفوك= والزين من خلاك مثل الوداعة
اليوم نشرب بن منهي ومهلوك = والياشربنا منه شفنا الوجاعة