اللي ماعمره فكر انه يربط حزام الامان=من الضروري يربط حزامه ليا منه ركب
لو المسافه ربع كيلو من مكان ليا مكان=لايستهين بقلة الاخطار ويصير السبب
لوكان متمكن وعنده رخصه وفحص وضمان=من يظمن انه مايجي مسرع وياكل له مطب
اما على نغمة سميرة يرقص وعوده ليان=وإلا يغني له لحن ماله علاقة بالطرب
ياشين مشي التهلكه يازين مشي الاتزان=والخطوة اللي تازن الرجال هي عز الطلب
الحر يفهمي مقصدي من قبل لا اشر بالبنان=والخبل مايفهم كلامي لين عفشه ينكب
أقولها وانا ماهمتني صواديف الزمان=صكات بقعا صفقها في رأس من روس العرب
حنا بعصر السرعه اللي مابها عطف وحنان=تأكل عباد الله مثل ما تأكل النار الحطب
من اول الفارس ليامنه ركب فوق الحصان=مايحتزم ياكود بالخنجر وبالسيف الحدب
لاما طلع صقر الجزيره واسس صروح الكيان=خلا السباع الجايعه تتبع قوانين الادب
نصيحتي قدمتها بأسلوب سحر من البيان=ولاهو ضروري تنقرا ولا ضروري تنكتب
أهم شي توصل رسالة لها مغزى وشان=ولايلحق الرجال لامنه نصح لوم وعتب