الصدر ضاق وضيقه يابن دومان = عودٍ تردى حالته كل يومي
ماغير اطالع فيه في شوف الاعيان = وادعي له الي في عباده رحومي
سبحانه الي كل يوم وله شان = تفنى العباد وحده الي يدومي
اوجس اوجاسه كل ماصار سقمان = احساس والا طبع ابويه كتومي
ياشفت حاله صاير تقل عيدان = من المرض قامت تليم همومي
امرض من وجاسه وانا ماني مرضان = ولاتنام عيني كان عيا ينومي
كنه يقول انته الى الان سهران = وقوله لاتشيل هم مخدومي
من عقب ماهو لثقيلات عشقان = تثقل عليه اليوم حتى الهدومي
العمر له حكمه على حال الانسان = يبين به لو هو قوي العزومي
عبرت لك عن ضيقة البال بشجان = ولالي بضيقتك يابو تركي لزومي
عساك تبقى مثل منته كحيلان = سيف لنا دون القبيله صرومي
يامعرب الجدين خال وعمان = من كل جد جاذبينك قرومي
زيارتك واجب عليه وانا الان = ضرفي مثل ماتشوف فيه محكومي
مرافق مع شايبي بين شيبان = بين الدكاتر والابر والكرومي

حي الرسايل من رفيقي بليهان=خالد ولد موسى قوي العزومي
رسايل الطيب لها نذعن اذعان =طبعي مقابل طيبه بالعدومي
نسعالها نسعالها قدر الامكان=سلمٍ لنا ياطيبين السلومي
معذور ياراع الوفاء طير حوران=الله يلوم اللي لمثلك يلومي
بالوالدين البر من زود الايمان=تلقاه بالدارين علم محتومي
أكيد ميزانه على كل ميزان= يرجح باذن ربٍ لوجهه نصومي
للتف ساق بساق والجسم عريان= من عق شيبانه يعض البهومي
حضيض من يدرك رضاهم وكسبان= للوالدين يصير مرن وخدومي
وادا حقوق الله من دون نقصان=وعن زلة الاقراب دايم يشومي
وان جاه محتاجٍ عثى فيه ديان= من جور وقته بالخطام أمخطومي
يقدم الميسور خفيه وسفطان= طيب لفعل الطيب دايم يرومي
شرواك والدنيا على كف شيطان=نوبٍ تزين ونوب فيها ثلومي
يقال فيها دايم الطيب أمعان= والطيبه ماهي بكثر العلومي