نبـا نسيـر يــم راع الجمـالـه=من روس ربعٍ للجمايـل مداهيـش
عجـاب روقـي والسوالـم خوالـه=ربعي خوالـه والعمـام الحناتيـش
من معجـزة عجـاب فعلـه بخالـه=يوم الامل فلّت بيد غـازي الريـش
نصاه والحمـل الثقيـل ارتكـى لـه= وقال ان عجزت اشيلها عنك ماعيش
خلص عن المديون من حـر مالـه=مـدة غبينـي مالحقهـا مطاريـش
والله لاثنـي كـل ماجـاء مجـالـه=لو يزعلون اهل الخشوم المطانيـش
ما قولها ابغـى كـاش والا كفالـه=عليَّه ابغض من نقـاش المناقيـش
مابه جميـل بـدون جهـد وعبالـه=ومكارم الاخلاق تنفى هـل الطيـش
وعد الثنى يستاهله من سعـى لـه=بقول وفعل مايهمّش المدح تهميـش
عجـاب واخوانـه رجـال الجزالـه=عندي دليل ان صار بالمدح تفتيـش
ذباحـة الحايـل لمـن طـاب فالـه= ولطامة العايـل بمـاص النواتيـش
وإلا الردي بالمجتمـع شبـه عالـه= يحسب حسابه من حساب الدراويـش
مايجتمع بالشخـص طيـب ونذالـه= والظبي راسه مالقوا بـه عراميـش
واللي صديقـه فـي حياتـه ريالـه= كلمة هلا ويامرحبا به علـى ويـش
ضعـاف العقـول يلبسونـه نعالـه =وسموه باسم حصان لو انه كديـش
المـال مـاعـزز ردي الاصـالـه=والقـل مانقـص مقـام المداغيـش
عسى السحاب اللي صـدوق خيالـه= تبكـي عقابـه والقدايـم مراهيـش
يامـر مكاييلـه عظيـم الجـلالـه =من العصر لين يبين نور المغابيـش
عشـر ليالـي والمطـر ذي حالـه=بمرتع مجاهيم وبرهـن عكاريـش
يندب لهـن عجـاب مكـرم دلالـه =بالهيل مع بـن اليمـن للمعاطيـش
ورثة جدوده من عصـور الجهالـه =يوم الرمح والسيف والخيل والجيـش
واليوم نمشـي تحـت ظـل العدالـه=اشمل شمال طريف واجنب وراء بيش
وبالمحوري عقب الرشـا والمحالـه =صارت مظامي نجد هي مصدر العيش
ومـاقـل دل ولانـحـب الاطـالـه=تمت وصلى الله على صفوة قريـش
الهادي الصـادق بصـدق الرسالـه= وحيٍ من المعبود مافيـه تغشيـش