انا هيض عليه يوم وقِت الحيدّ ابا المزبان = نهار إن الشريف اوجه على الديرة بمجرادي
يليّم فالقبايل من بعيد وشي من قحطان = وأحد منهم يجيبه من عِلُو الشرق من غادي
ولقيوا بشر فالمصغى ثنوا بالروم والسلطان = لكن الغافل اللي مادرا ماهو كما العادي
سرو فوق الركاب اللي خفاف وصبْحو عسفان = وقفوها الخيول اللي لها فالحزم مرجادي
والا ياوجد روحي يانهارٍ جاء على الحمران = نهار إن البيارق جاتهم تزفى مع الوادي
وظلا الملح مابيناتهم كاتف كما الربان = من أيمان السكارى كِنه ألا القوس منقادي
تذكر يالعتيبي وش مضالك في مسيل غران = لكنك لا ترُوح وتشتكي وتقول ياسيادي
أُكل ياذيب وأذخر لك شهر من طايح العتبان = وحتى الضبعة النمرا حست لعيالها زادي

هيض عليه وانا طرقي وداري بعيد = بِديت سِدر اليماني قبل ماحدٍ بداه
ضلعٍ يسمى وراء الضلعان ضلعٍ سديد = دُونه حِرار الهدى وجبال مكة وراه
قده عيونٍ عليها سابحات الجريد = والحبحب اللي على المحجِر على مستواه
جاني عليه الغزال اللي في عمره جديد = مركوز عُوده كما مركوز عُود القناه
ونوست له بالحَساس وقلت اظنه يعيد = والياه مايلتفت فيه ماش الا قفاه
عودّت اغني والرد القاف وابدع نشيد = والياه يوم التفت يسبُر بحيد الحصاه
والياه وإنه سوات الثوب الابيض جديد = ثوبٍ مع التاجر اللي ساع نشّر طواه
أثره مربى الخلا في كل يومٍ يزيد = لاهو برامي ولا جوه العيال الرماه
ياليت يشحا القرى والمنزل اللي عهيد = والياه يشرب من البركة ليا الله عطاه
ياليت عندي ثلاثميه وعشرة عبيد =واسوقها فالغزيل بالقلم وادواه