المشاركة الأصلية كتبت بواسطة صويلح السحيمي

لاباس يلي هواجيسه يخلنه=يقضي حياته مابين الشك والريبي
عن كل ماتشتهي نفسه يحبسنه=حبسن مؤبد ويلقى فيه تعذيبي
وليا بغا يهتني بالنوم صحنه=وليا صحا عقبن له جرح مايطيبي
ابن زويبن هواجيسه يحدنه=يكتب قصيده على ضو التجاريبي
بعض التجارب لها وسط الحشا رنه=يسمع نداها لبيب القلب ويجيبي
ايقولها الي عظامه مايقلنه=ياوجد حالي وياويلي وياشيبي
انا شفوقن على جمع الوفا لنه=همزة وصل بين صدقاني واقاريبي
اكتب وفا واليال الغبر يمحنه=والي تجملت به يمسك تلابيبي
العام نبذر بذور الطيب ونظنه=ينبت ويثمر ونقطف ثمرة الطيبي
واليوم مهما بذرنا بذرنا كنه=مبذور في صبختٍ جوف اللواهيبي
واليا بغيت احتمل لظّلم واكنه=تصبحبي اهمومي القشرا وتمسيبي
يالله يالي ماغيرك يسمع الونه=ياعالم بسري وجهري وداريبي
بامرك وعطفك وبحسانك ياذا المنه=تصلح لي الحال وتحقق مطاليبي