في حزتن يومن مشينا المدينه=حصلتلي وحده من اربع قسايم
طبيتلي في ورع باقصى يمينه=علامة الجندي وهو حيل هايم
يومن تعديته وشغل ونينه=كني انا وسط المقاليع نايم
ياراعي الموتر تجنب ذحينه=اصحا تروح لاتلوم الملايم
هديت انا بكل يسر وسكينه=ولبقت جانب لوحة افطار صايم
واقول في نفسي وكلي غبينه=صادوني اللي ناصبين الغنايم
يالله تستر منه يالله تلينه=يالله ياللي دايم الدوم دايم
نزلت انا من موتري صوب عينه=قلت العفو جوي ترا حيل غايم
قام يتبسم ثم حكحك جبينه=ويقول مالك سالك الخط حايم
قلت الصبرحنا ترا محتوينه=والبال والله مارضي بالهزايم
قال القسيمه ذايقنها ثمينه=سرعه ورخصة ولاربطت اللمايم
والرابعه ياخوك تركيب زينه=واظن بثنيها لكثر اللزايم
اقبل علي وثم طلع يدينه=قال استلم ياخوك حلو الطعايم
لديت فيها وانها مستهينه=وضحكت في وجهه وانا حيل شايم
قلت ياخوَي قلي على الدرب وينه=قال انتبه لالاتزيد العظايم
وصلاة ربي عدَّ اركان دينه=على النبي واصحابه اهل العمايم

المشاركة الأصلية كتبت بواسطة عقيد الخيل (المشاركة 660302) الله الله الله صح الله لسااانك وبيض الله وجهك ابدااع × امتااع العقيد

المشاركة الأصلية كتبت بواسطة الحميدي الحربي (المشاركة 660639) السلام عليكم ورحمة الله وبركاته سلمت ودمت أخوي الشاعر ‏الـ ح ـربي على القصيدة . . . جزله ورائعه وصح لسانك أخوك ابوساره