ياهاجسي دام القوافي حضورها = تنومس حضوري في جزايل حضورها
ويشوش راسي لالفني غزايزك = كني على هجن الشعر فوق كورها
هجن تورد كل ظامي لعدها = عد القراح اللي نمت به زهورها
زهور الهجوس اللي ليا قلت وينها = جتني فرايد من غزاير بحورها
اقطف ثمر مالاق من طيب جزلها = والنفس تهنى في طرايب سرورها
وجزل المعاني والمشاعر تداحمت = في ليلة قمرا تلالا بنورها
في ليلة نظمت فيها جزايلي =مدح وثناء والنفس هذي شعورها
بعيلم يزمي وتزمي جمايمه = نسل الرجال اللي طوال شبورها
ابوبدر سيف القبيلة ودرعها = على الاعادي حربة في نحورها
نحور الاعادي يوم زامت نفوسهم =وتطاولت لكن نفت من جذورها
بسيف الشجيع اللي خصومه تجندلت =بساحة الميدان باهت امورها
عشرين عام وفوقهن عشر مثلهن =وسباع الخلا تشبع وتشبع طيورها
من راس من دنياه غره وعودها =ولايدري انه في حبايل غرورها
ولايدري ان الحرب من اسم جدنا =حرب الزعامه من قدايم عصورها
حرب الذي اسمه ينوخ ركابهم =وترغى ونار الحرب بانت شرورها
ولايدري ان عضيب غيّب نجومهم =نجوم من نفسه تزايد فجورها
عضيب الذي بالمجد بيته مشيده =بالمعجزات اللي تلاطم بحورها
عرق الظفر شيخ المواقف وتاجها =البيضا زهت له وكتبنه سطورها
انه زعيم القاف والعز نايله =وانه لحرب الروم دايم فخورها