البال ضامي والمعاني كما البير =ومن يارد الجمه يبي يعود رويان
يوم القصايد قدم عيني مزابير =مثل البكار الفاتنه سحر الأعيان
إخترت منها ما يسر النواظير =بكره عمانيه بلا سرج وعنان
لا درهمت قدام صف الجماهير =صفق لها شخص ٍ على الوضح شفقان
وإليا دخلت في شوط قدم المناعير =منزالها الأول ماهي تطلب الثان
في خدها وسمي وفالجنب تقرير =مضمونها يرسل لأبو خالد الآن
سلام يا نسل الرجال الأباطير =اللي لهم في صفحة المجد عنوان
أبو اليتامى والضعوف المكاسير =يبذل خفا ماهو يجاهر بالإحسان
هداج تيماء فالليال المعاسير =شيخ الكرم والطيب طلق الحجاجان
سلطان بك ميزه فريده عن الغير =إسمك حروفه عز والفعل نيشان
السين سيـّـد خصك الله بالخير =تعطي طناخة رأس ماأنته بمنان
واللام لامديت سقت التباشير =للي شكى في تالي الوقت حرمان
والطاء طيبة قلب واسمى التعابير=ترسم على وجهك ليا شفت مرضان
والالف أحلى من حليب المصاغير=شوفتــْـك متــْـعافي وفي خير وآآمان ..!
والنون نايف بين كل الأساطير =مْن العراق لنجد ولــْـساحل اعمان
إسمي سواة إسمك ولا أظن به ضير =أبوي سماني على طير حوران
لأجل أفتخربه بين كل المشاهير =ربحان من سمي بهالوقت سلطان
حتى المرض مابه ترى عيب ياأمير =لاقال أبي سلطان من بد الأكوان
لأنه مثل ما قيل للذنب تكفير =وخير إمتحان بصدق في قو الإيمان
وأنته نجحت بفعل خير التدابير =بعد الولي اللي على الفعل برهان