العين تشكي ياعـرب قلـّة النـوم=طال السهد والوضع مزري وكايـد
قام السهر يهجم على طرفي هجوم=هجوم ناد العين فـي كـاس زايـد
دايم وغاراته على العين بسهـوم=حتى غدا نصـره بحربه عوايـد
بسباب ود ٍ عشته العام مشـؤم=مع واحد ٍ ماشفـت بعـده فوايـد
اقفى وورث صورته داخل البـوم=لـولاه والله ماكتبـت القصـايـد
قصة غرامي روحت كنهـا حلـوم=فيهـا كوابيـس العنـا والشدايـد
قصه جرت يشهد بها ليل وانجـوم=منها يشيبـون الصغـار الولايـد
لو تنشر الندوه على صفحة اليـوم=ماضنتي بالسـوق تبقـى جرايـد
ياناس دلوني علـى حـل مفهوم=علمي عرضته للعقول الرشايـد
من بعد شرحي صاير الوضع معلوم=نبغى مشورة شخـص منكـم محايـد

يا صقر لا تشكي الهوا تِقِل مكلـوم=ترى الهوا يـودع صويبـه بدايـد
طرد الجوازي كله الْكـام و الْـدوم=و جروح طاردهـا قبلهـن جدايـد
حتى لو انه من مشاكيـل و قـروم=بآخر مطافه يصبـح الحيـل بايـد
ذي بنت حوّا طبعها المَيخْ و الزَّوم=هـذي طبيعـة لابسـات القلايـد
حاجاتهـا دايـم تجيهـا بمرسـوم=و العازه اللي عندهـا شـي كايـد
لو صار قلبك لاجلهـا كلـه ثلـوم=و لو قلت فيها محكمـات الشرايـد
ما تستمع صوتك و لو جيت بسلوم=تسفـه مناديهـا وهـذي عوايـد
ان طعتني طِرْ يا صقر و ابعد الحوم=واغسل هواها من خفوقـك بتايـد
البحر مليانٍ "سبيطي" وبه "عُـوم"=اتعب على صيده و لو هو امْكايَـد
هذي نصيحة واحدٍ جـرّب الصّـوم=عن حبهن و اصبح مع الوقت صايد

قريت خطك واصدر القلب مرسـوم=وآنا فـي حـزات الملازيـم قايـد
من يشتكي لي هم مايبـات مظلـوم=وما ارضى على مثلك تزيد الزوايد
والود مر وراعـي الـود مهمـوم=ما يهتني بالنـوم فـوق الوسايـد
كم واحدن قبلك خرج منه محـروم=وهذا الامر من سابق الوقت سايـد
والبعض حصل فيه بسكت وحلقـوم=وهذا من أللي يحكمـون المصايـد
من عامل اهل الود باسلوب محكوم=يجني من الود العسـل والحصايـد
ومن شاف من وده غماليج وعسوم=يصبر عليه ويرتجـي منـه عايـد
الصبـر مابيـن الموديـن معلـوم=من سابـق الايـام طيـب وفايـد
ومن كان بعد الصبر ماشاف مقسوم=والود يتمادى معـه فـي المكايـد
ماهو على العيشة مع الود ملـزوم=يستبـدل دروبـه دروبـن جدايـد
والله كريم ان شاف الانسان مظيوم=ينعم عليه بكـل مـا كـان رايـد

حنا عروبه ياصقر قوم فـي قـوم=مانحقر الاعيـان فـوق الحدايـد
نفزع وناسـن مايعرفـون للنـوم=لن كان ماتـدري تجيـك الزوايـد
واسمع شِكْات العين والطرف معلوم=يومـي طلايـب بينهـم بالوقايـد
شبعانه الاعيان والطرف محـروم=والناتج إمخسـر وماشـي رقايـد
تبدع مع الشعـار بكلـوم وكلـوم=حسب الذي جتنا عليـه النشايـد
قصة غرام القلب والصـد واللـوم=قلت الصبـر دايـم يحـل العقايـد
راع السهر دايم من الطرف مدعوم=فيه الوساطـه عاشقـه بالوكايـد
هذي حيات الـود والـود مبهـوم=مايجهله من عاش بحـر ومهايـد
لاتحسبن الود بيبسـي وجمجـوم=الـود ياقـاري كلومـي زهـايـد
والصبر لازم وانت بالصبر ملزوم=ولولا الصبر ماجاك قايـد ورايـد

لابأس ياصقرعسى مأنـت مظلـوم=إن كنت مظلوم حنا للظالـم عنايـد
إن كان الطريـق واضـح ومعلـوم=ولاصاربه عوجاج وعن السنع محايد
مايبطل باطل إلا جينـا آلـه قـروم=ينهبون الحق من الباطل لو كان كايد
بالحق نقـاوم والحـض لنـا يقـوم=نأخذ بطرق المقاصد ولانخشى هدايد
وإن كان طريقك محايـد ومحمـوم=من دونه يلفح الهواء اغبار وحسايد
عود يا أبن العم ولاتجـاري القـوم=اترك المولـي ومطاعيـم الزهايـد
خلـك فـي دارك وأمـش بسلـوم=مايجي مثل الملك يرفع الرأس بسنايد
يحييك ولايجي فـي مقامـه عـدوم=بسعدك يسعد ولايدور غيرك سعايـد