شيبت يا محمد وأنا فـي شبابـي =من كثر ما ايام العنـاء صافقنـي
سود الليالي والحزن عنـد بابـي =خاواهم الحظ الـردي ليـن جنـي
امشي ولا بين مع النـاس مابـي =واضحك من علومٍ قهر يضحكني
الصبر مبدأ لي ومخـرج جوابـي =قانع بمقسومـي وممشـاي قنـي
يا ما نظن وكم مـن ظـن خابـي =ويا كم علمٍ منه العقـل جنـي
لي شايبٍ فالنايفات اعتلى بـي =وهلت سحايب غيثه اللي سقنـي
رويت فكري ثـم عرفـه سرابـي =ومن بحر ميزه بالمعانـي رونـي
وان شفت وقتك يامحمـد سرابـي =خلك على دربـي ولاتحيـد عنـي
ولاطاب لك يومٍ به العيش طابي =لاتحسـب ايـام العمـر اشرقنـي
واحذر ترى الأيام فيهـا انقلابـي =تمسي غني والصبح فقرك يدنـي
واحرص على دينك تجيك الوهابي =والوالدين ابـذل لهـم كـل فنـي
والنفس حاسبها وصف الحسابـي =ترى الكتوف اقلامهـا يرصدنـي
ولاتكون يامحمـد كثيـر العتابـي =بالذات مع حيٍ معـك يسكننـي
وياك تمشي مـع رديٍ وهابـي =خلك مع اهل الطيب وبالجود ثنـي
واكرم ضيوف الله وسوق الركابي =يـم القرايـب والعوانـي وحنـي
والظلم لايطريك يـا لـه عقابـي =يا كـم ظالـم موتتـه تحزننـي
وشهادة الحـق قولهـا لاتحابـي =ومنهو زعل منها عسى ما يثنـي
وياك فالمجلـس تثـر الزهابـي =خـل العلـوم الخافيـة تستكنـي
ولاجيت مجلس لايضيع الخطابـي =خل المعانـي بالجـزل يخرجنـي
ولاتترك الفرصة ونيـل الثوابـي =في شايبٍ لقبل وغيـرك مدنـي
والجار لو دونه تقـص الرقابـي =من دون جارك خلهـن يقطعنـي
ابيك ذيب ومجلسـك مـع ذيابـي =في عالي المرقـاب مـا ينزلنـي
وان قام حظك لاتهـاب الصعابـي =بالحظ غصب لطاعتك يخضعنـي
هذي وصاتي لـك وهـذا كتابـي =لاتلحقـك فيهـا مشاريـه منـي
اشرب معانيها ويهنـى الشرابـي =تـرى العلـوم الطيبـة يثمرنـي
وياالله تلهمني طريـق الصوابـي =وتغفـر ذنـوب بكثرهـا تعبنـي
وصلاة ربي عد وبـل السحابـي =علـى محمـد قالهـا كـل سنـي