ملتقى قبيلة حرب الرسمي - الى لافي بن حمود الغيداني

ياراكب اللي لامشا كنه يسوق ولايساق=الياعتلابه سايقه في هــــــــــمته عـــــــنده ثــقـــــه
لادق سلفه واشتغل تقول ناوي للسباق=ولاعشقه السواق ويش يصـــــــير لامن عشـــــــقه
يفز فزة مسلم(ن) ناصي يهودي باالعراق=ماهمه جيوش التحـــــــــــالف يوم جات المنـــــــطقه
لاجل الشهاده مايهمه لويموت باحتراق=متحيزم(ن) بحزام ناســــــــــــف في جســــده موثـــّـــقه
اليا هزع له مع دروب(ن) ينطلق فيها انطلاق=يرسي بطـــــــريقه دون صوت ودون حتى طقطقه
سبعة(ن) والفين صدر جيب باالتصميم فاق=علامة اللكزس عليه من الخــــــــلاف ملصـّــــــــقه
اليانطح كنه حبيب ناطحك يبغى العناق=واليا تعدا خاب عزم اللي يفكر يلحقه
سايقــــــــــــه بيني وبيــــــنه عاقدين الاتفاق=يوصّل المرسول قبل تــــــغيب شـــــــــــمس(ن) مشــــــــرقه
على طريق الدايري في كل عزمه يوم ساق=عارف(ن) درب القـــــــصيم وقد هــــــزع مع مفرقــــه
مايهمه لو يجي باالدرب كتمه واختناق=ولاعليه من الغيوم المرعـــــــــــده والمــــــــــــبرقه
موصف(ن) له وجهته ومعطيه انا وصف(ن) دقاق=الياوصل دخنه نشد اهل الوجــــــــــــيه المطلــــــقه
عن شاعر(ن) له في ضميري قدر وافي واشتياق=ومعزّته في داخـــــلي والله ماهي ملــــــفــّــــقه
ايوالله انه غالي(ن) اقولها ماهو نفاق=اقولـــــــــــــها لو زودوا اهل النمــــــــيمه النقنـــــــــقه
لافي بن حمود لاجيته ورحب بك وساق=فنجال بن ولازمك لوهــــــــــو بيدينـــــــــــــه حقّقه
بلغه مني سلام (ن)صادق وحلو المذاق=من شاعر(ن)طاروق شعره فـــــــيك يالافــــــي طرقـــــه
انا نصيتك يوم همي زاد واصبح لايطاق=باشتـــــــكي لك من عذاب ومن هموم مقلقــــــــه
وش حيلة اللي يشتكي في هاالزمن جرح الفراق=لاصبر عن شوف خله زاد همـــــــــه واحـــــــرقه
استيسرت قلبه هنوف(ن) اشتكا منها وذاق=من الحزن كاس(ن) بيدها مدته وقـــــــــــالت ذقــــــــــــه
قد قلت انا ياطايشه ارجوك فكي لي الوثاق=يامن وضعتي القلب ماسورن بحصــــــن (ن)مغلقه
هيااقتليني مابقا في داخلي دم (ن)يراق=انا ضحية حب صادق مارضـــــى باالــــــتــــــــــفرقه
دارت الدنيا وعقب وقفه بدت باالانطلاق = وابتدت ترفق بحالي يوم جتني مشـــــــفـــــــــــقه
خطبتها لكن قبل مايستريح الصدر ضاق=ومن قبل حتى لايجينا الشيخ لاجل نصدقه
تلخبطت دنياي فجاه وابتدت باالاصطفاق=وضيّعت دربي مااعرف غربه ولااعرف مشرقه
بغيبوبة(ن) مرّت سنه ويوم العقل باالراس فاق=جتني هموم الزمن جتني وهي متدفقـــــه
اكبر قهر من طعنة(ن) ياليتها جت من رفاق=ومن قبلها ياليتني مـــــيـــــت بحبل المــــــشنقه
من خبر جاني وكنّه صافق(ن) وجهي طراق=قالوا قريب(ن) لي خطبها والعلوم موثـــــــقـــــــــه
ياعسى الله يوفقه لوان همّي مايطاق=ياعسى الله يوفقه ياعسى الله يوفــــــــقــــــــــــه
اليوم هي في ذمته يومه غدر فيني وباق=حلم(ن) رسمته في حياتي في يدينه شــــــقـــــــــقه
ومادامني رجل(ن) بجنب راضي(ن) باالافتراق=واللي عطاهم بالكريك يمدلي باالمـــــــــــــــلعقه
باعز نفسي باالصبر يوم انقطع حبل الوفاق=وان طاح عزمي هاالشنب عهد(ن) عليه لاحلقه
قصة حزن في واقعي لاماختلقها اختلاق=كتبتها بحبر القلم ابيــــــــــــــات من فوق ورقه
وختامها صلوا عدد نجم سطع فوق الافاق =على النبي اللي رحمنا الله يوم انه خلقه