العام باب العز والقدر مفتوح = مشرع ٍفي ليل وإلا صباحي
لاجل الصداقة بيننا تجي وتروح = عليك من حسن الصداقه وشاحي
حيثك عزيز ولا بدا منك منضوح = شئ يغير فكرتي و ارتياحي
صديقنا نفداه بالمال والروح = ونصير بالشدات درع ٍ سلاحي
ناقف معه لين ازمة ضروفه تروح = حتى يبدل ضيقته بأنشراحي
بجهودنا عنه اكثر الحمل مطروح = نشيل حمله لا تعثر وطاحي
وإن صار له في درب الأخطار ساموح = نقوم وندله طريق الصلاحي
وانت الذي صداقتك مالها روح = طارت علومك مع هبوب الرياحي
وين الكلام اللي كتبته على اللوح = رمز الصداقة والوفاء والتضاحي
صداقتك بالمصلحه ريحها يفوح = بانت عيوبك من جميع النواحي
من اول ٍ لجاء الخطاء منك مسموح = والسر مابيني وبينك مباحي
واليوم بعد ان الخطاء صار مفضوح = غيرت رايي واتخذت اقتراحي
ترى الخطاء مابيننا ماهو مدموح = احذر وخلك للمقابيل صاحي
وجير صداقتنا على كل سلتوح = سلتوح . وإلا من طيور الفلاحي
الحاصل انّا مالنا فيك مصلوح = يا مساوي يدين الكرم بالشحاحي
سلك العلاقة بيننا صار مجروح = خطير قطعه بين ليل وصباحي

نداء الغيداني