فات شعبان وهل شهر الصياما= والناس بقدومه تزيد التهاليل
حيثه عليهم له فضايل عضاما= رحمه وغفران وعتق من الويل
وقدمه يصفد كل شيطان هاما=ويذوق من مر العذاب البهاذيل
مدة شهر مايحترك بالتماما=مكبله رب المخاليق تكبيل
فرصه ثمينه والفضايل كراما=للي يصوم ويكثر الذكر بالليل
لكن وين اهل الهمم والهماما=من ميز بالناس شاف التهاويل
شاف الشوارع كل ابوها زحاما= تمشيبها العربان فرد وجحافيل
ماهولجل مسجد وذكر يقاما=لجل المطاعم والاكل والمواكيل
كن العرب ماذاقت الاكل عاما= ولا عن النعمه منول مغافيل
الحاصل ان مافيه شي مايساما= ولاتشوف بالاسواق لوحات تقبيل
وكل طبخة(ن)بالعصر تطلع تماما=مايعرف الجيعان غير كم ويشيل
تقبل لبيتك من حمولك تواما=متعلقه بيديك نعمة زنابيل
شي شراب وشي منه طعاما=وشي محمل فوق الاكتاف تحميل
هذا زياده فوق شغل المداما=تلقى على السفره صنوف وتشاكيل
وليا أذن المذن وحل الصياما=تقاربو شيابهم والجهاهيل
ولا ينوكل ربعه ويبقى ركاما=ثم تنرمي النعمه بذيك البراميل
ياناس خافو الله هذا حراما=خافو منالله فرعكم يارياجيل
لالاتصيرو من ضحايا الغلاما= اللي دموعه فوق خده هماليل
ينظر بابوه محزم بالحزاما=ثم جاك متمرد على الخلق بالحيل
خلا من العالم كثير المناما=وخلا من العالم تعوب وكواسيل
واستغفر الله صار شهر الصياما=اكل وتسوق بين جاهز وتفصيل
يالله تهدينا لهدي الاماما=وتكتبلنا جنه وعتق من الويل