أمس العصر لجل أشرح البال سجيت=نفسي من هموم الليالي حزينه
طفشت من برا ومن داخل البيت=ومن لجة الاصوات وسط المدينه
وقصدت لي بر به ليا تخلويت= ارتاح به من زود مابه سكينه
وسرحت مع حالي وسندت ونحيت=والمبتلى رب الخلايق يعينه
وقبلت لي شعب به العام مريت=وليا العرب متمشيه نازلينه
ومن غفلتي ارتاع بالي وفزيت=شفت الغزال اللي يباهي بزينه
ادعج غنج ماشفت مثله ولاريت=وليا مشى يمشي بوقار وسكينه
ياويل حالي كل مافيه حبيت =سبحان من ابدع بخلق وزينه
ومريت من عنده وبالشوف غضيت= متخطره كلي ثقل من يمينه
أخاف لامني به شوي لديت=يجفل ونا كلي رهن رمش عينه
وبعد بعدت شوي وقفت ثم جيت=باكلمه بامان عن والدينه
لكن بعد ماشرفت بالرجم وابديت=نادوه باسمه قالو فلان وينه
وجاهم وركبو كلهم بالشفرليت=وطلعو من الديره وراحو غبينه
واحن قلبي حن موتر بلا زيت=ليا أشتغل توحي قريع المكينه
ودي أولع في ثيابي بكبريت=أقلع به السواق ويني ووينه
ياليتني امس العصر ماتمشيت= ولادارت الاقدار بيني وبينه