صلاة ربـي عالنبـي الشفيعـي=محمد اعطـاه الولـي الشفاعـه
وايقت في دنيا فضاها وسيعـي=واقول يادنيـا عليـك الوداعـه
عزاه ياهـذا الزمـان الفظيعـي=شيب براس الطفل وقت الرضاعه
والوقت عود في مداره سريعـي=وفي كل يوم نشوف شين فطباعه
احدٍ تعـلا فـي مقـامٍ رفيعـي=بالمال ماهو بالكرم والشجاعـه
واحدٍ شجيع ولالقي له سميعـي=رجـال لكنـه بلتـه المجاعـه
واحدٍ عطاه الله خيـر ويضيعـي=واحدٍ فقير وملتـزم بالطواعـه
وكم واحدٍ بالغش يشري يبيعـي=ومطففٍ كيله وغـش البضاعـه
وان قلت يحرم قال هذا طبيعـي=هذي تسمـى فالتجـاره براعـه
ولا عاد تلقى للامانـه وديعـي=إلا القليـل موقفيـن القنـاعـه
ويامكثر اللي جاحدين الصنيعـي=ارضٍ صبخ ماتنقنـي للزراعـه
وابليس وايق واعتلا كل ريعي=بين الولد وابـوه سبـب قطاعـه
وكلٍ تشيخ قال انـا مستطيعـي=مالي عضيدي فالرخا والشباعـه
راح الملاقا والنهـار الشنيعـي=كلٍ لحاله مايبـي لـه جماعـه
وكم واحدٍ طعناه عيَـا يطيعـي=واللي بعيد يقول سمـعٍ وطاعـه
وجيلٍ بدا من صغر سنه يصيعي=وقام يتعلم في فنـون الصياعـه
للغرب صـاروا أمعـاتٍ تبيعـي=ولا النبـي مافكـروا فاتبـاعـه
ممصوخ لا سني ولاهو بشيعـي=يختٍ مع الامواج يلعب شراعـه
وحتى الجبال الصم خوفي تميعي=من كثرة اهل الفسد واهل المياعه
والخوف من ذيبِ تولى القطيعي=يصلخ وياكل مانوتـه الشباعـه
الظاهر انه يفترسهـم جميعـي=مادام فعيونه يشـوف الطماعـه
اما رحم ربي بصقـرٍ شجيعـي=ياطا على كبده ويكسـر ذراعـه
ان صار قلنا جاء الهنا والربيعي=ولا على الدنيا نقـول الوداعـه