|
إلـــــــــيا متى وحنّــا كـــذا
بسم الله الرحمن الرحيم
يسعدني ان اطرح بينكم هذه المشاركة الجديدة والتي أتمنى ان تحوز على رضا الجميع .. تقول : إليا متى وحنّا كذا ودايم نقول ما همنا إليا متى وحنّا كذا ونقول هذا طبعنا إليا متى ....... إليا متى وأفعالنا بس بالكلام وإلاّ الفعل ما اهنا فعل بس بالحكي أفعالنا وين الإرادة والعزم.... وين الصبر وين الهمم دايم كذا ... وحنّا كذا خطواتنا دايم قصيرة ما تطول وإذا مشينا خطوتين وشفنا التعب نرجع وراء.. واليا بغينا نعيدها! نرجع نعيد اللي بدينا من جديد حنّا كذا ... ودايم كذا لا ! ما يصير وفي يديننا شيء كثير وإلا نصير بالمجتمع معول هدم ومالنا أثر إلا نقول: هذا حكا... وهذا سمع وهذا يسحب مشلحه وبيدينه دايم مسبحه والود ودك تذبحه وهذا ينم .. وهذا يسب تدعي إن ربك يقلعه وهذاك ما عنده شغل هايت ولا عنده عمل وإن نام ودك ما يقوم من كثر أذاه .. ومن غثاه تدعي إن ربك يصلحه وإلا يموت ، والناس تسلم من بلاه وهذاك شايب منتهي ما أحدٍ سلم منّه أبد لسانه سليط ... ودايم عبيط آخذ حياته بالعناد وإن قلت وش هو له كذا يرد ويقول لك كذا وأنا كذا .. وهذا يقول إنه مدير كنّه معاليّ الوزير ومن الكبر معاد باقي إلاّ يطير ماله شبيه ... ولا له مثيل مدير ومن قده مدير وإليا نطق قال كلمتين الكلمة الأولى نعم وإلا نفاها بكلمة لا هذا المدير وإلا فلا ويبغاك دايم تمدحه وأنت أمدحه ولا تمدحه إلا أكيد لمصلحة وإن كان قمت تشر شحه هي حاجتين أمّا يا أنه قام وفصلك يوم أنت قليت بأدبك وإلا نقلك لأبعد إدارة ثم قلعك ولو منت تحت إدارته وصى عليك ثم أمتحنك وإلا إن لك عنده معاملة أما يا انه فيها حذفك وإلا النظام يمشي عليك ثم أنتظر حتى تجيك وخل السوالف تنفعك وهذا يقول إنه كبير ومدير مكتب للأمير يقدر يحل.. ويقدر يفل ويقدر يصول ... ويقدر يجول وبإشارة من أصبعه اللي يبيه عنده يجيه ويا ويلك لو عنده تلف وإلا بغيت أنك تدور تدري وش اللي راح يصير إن ينسفك.. ويغيبك حتى يخليك تعتدل مثل الصراط المستقيم وهذاك ضابط رتبته مدري لواء وإلا عميد له سمعته .. دايم شديد واللي تحت وبقيادته من هيبته سموه بأسمٍ له جديد اللي يسمونه قديم باسم العقيد وهذا يقول إنه غني عنده من الدنيا كثير مال ورصيد ما تحسبه حتى ولده هذا الصغير سيارته آخر موديل وساكن له بقصرٍ كبير فيه مزرعة فيها زهور وفيها نخيل ما كنّها إلا جنته وهي منيته في دنيته ولا دار في باله أبد إن بهالدنيا فقير ياكل قليل .. وفراشه حصير وتصفعه بقعاء كثير وقمنا نعدد بالبشر ولا احد سلم منّا أبد واقول ياناس أعقلوا واللي هرجتهم عنّهم هم ربعنا ومن أهل البلد وش زودنا عنهم ترى إلا أنهم عانواا كثير وعاشوا الحياة وفيها تعبوا وياناس هذي أحوالنا مضحك ومبكي .. وفيه بعد فينا الغني ...... وفينا الفقير وفينا الكبير ... وفينا الصغير فينا العزيز ... وفينا الذليل وفينا الكريم .. وفينا البخيل وفينا شيخٍ باسمه سما وفينا شيخٍ باسمه هوى وفينا ترى الشيء الكثير وأمور بهالدنيا تصير بس المهم وهذا الأهم إنّا نغير طبعنا .. ولا نقول أبد ماهمنا لازم نحس إنا بشر أبد ولا خلقنا عبث وإلنا وجود .. وإلنا كيان ولازم نجدّ .. ونبني البلد مو بالحكي ونقل الكلام بأفعلنا كل شيء يصير ونبني البلد لولد الولد ونزرع ونغرس بأيدنا ونعيش باقي عمرنا بأفعلنا مو بالكلام ونقل الحكي ولا همنّا ..ونقول هذا طبعنا وحنّا كذا .. ودايم كذا *************** وتقبلوا تحياتي |
العود الازرق
الله يعطيك العافيه يابن العم كلام رائع جدأ |
هنا نقف صامتين امام هذه الباذخه :::
وليس لنا امامها سوى الصمت ::: : : : العود الأزرق لك من الحروف ارقاها ... ومن الكلم أجزله ... : : : لمعة الجليد... |
كلماتك معبرة متدفقة من الأعماق
الله يعطيك العافية يالغالي |
ــــــ
حمل الكثير من القضايا والهموم اعجبنى كثيراً تنقل بين الافكار بتسلسل دمت رائعاَ كاتبنا المبدع ــــــ |
العود الازرق
افكار رائعه وقضايا كثيره طرحت لها الحلول ابدعت الفكره واجت العباره شكرا لك اخي الكريم |
الغالي / فيصل حمود الوافي ..
لك التحية والتقدير .. سُررت بمروك ، إضاءة أنارت مشاركتي . تقبل تحياتي |
لمعة الجليــد ..
اسعدني إمضاءك ، حروف من ذهب في جبين الشمس ... للخطوات أثر على الارض .. وها هي حرروفك تطبع على أسطر مشاركتي . شكراً لمرورك .. تقبلي تحياتي |
راعي الحناكـية ..
لك الشكر موصول بابهى وارق العبارات . تصفحك لمشاركتي شرف كبير لي ولها . برسم إمضاءك لوحتي إزدانت . ألف تحية وتحية لك أخي العزيز ..... تقبل تحياتي |
الاخت / صميم الذات ..
للمشاركات عبير تزهو به .. وللإمضاءت أنامل ذهبية تنسج حروفها من ذهب ، وها هي مشاركتي بوجدوك معها تنتشيء الفرح .. وليس لنا من خلال هذه الكلمات التي إحتضنتها مشاركتي إلا تصوير ذلك الحال الذي يتنفس أوضاعه مجتمعنا .. فبادرتني إلى خيالي تلك الأفكار والتي معها ابحرنا قليلا ثم عدنا إلى حيث هذه السطور .. شكرا لك ولمرورك الكريم تقبل تحياتي |
الساعة الآن 10:31 PM |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir