ملتقى قبيلة حرب الرسمي - كثيرة مآسينا وهذه احداها ..

يــــــــــَـخــــــــــــــطِي الكُبار

شافْ طِفلينْ فْ .. طِريقْ

وِاْبْتِدا هَمّه يِفيقْ

وِيْتِساءَ لْ ...

لَيهْ أنا مانيْ مثلْ باقي الجَهالْ؟

لَيهْ أنا. ما لي رِفيقْ؟

بسْ عشانْ إنّي يِتيمْ!!

مِثلْ ما قالَوا ...

عِجوزَه أرْضِعَتْني

وِارْتِبَطْ اِسمي بِها

ويومْ ماتَتْ

اتْركَتْ تِذكارَها فوقَ الرِّصيفْ

ميراثها..طفلٍ تيتَّم مرِّتينْ

وَاسْمالَها وْكِسرةْ رِغيفْ

لَحَّ السُؤالْ..

لَيهْ أنا ما ليْ رِفيقْ!

واقْفزَتْ في الذّاكِرهْ

ذِيْكَ الْمَرهْ

يَومِ انّها تِعيِّرهْ

( رِحْ يا لِقيطْ )

علَيكْ مَليونْ لْعَنهْ

كِلمَه ارْسِخَتْ في الذّاكِرهْ

حاوَل يِفُك رْموزَها وما قِدَرْ
ويومٍ قِدَرْ

واسْتَوعَبِ الْكِلمَه وْفِهمْ

وِشْ هي عَنَتْ

يومِ لْعَنتْ

ذيكَ المَرهْ ...

هلَّتْ دُموعَه وُارْتِجَفْ

تِوسَّـدَ الْكِلمهْ ... ونامْ

والدَّمعْ بَعدَه ما نِشَفْ

( اللّهُ أَكبَر .. اللّهُ أَكبَر

صوتَ الأذانْ )

شيخٍ ضِريرْ

تِعثَّر بْطِفلٍ صِغيرْ

يا فلانْ قٌم

قُمْ يا فلان

فْلان ماتْ بْغَصِّتَهْ

نِقَشْ على ذاكَ الرِّصيفْ

( يَخطي الكُبارْ...

ونِدفَعْ ثِمَنْ ذاكَ الخَطا

حِنَّا الصِّغارْ ).....