ياقايـد الأمــه . . زعـيـم العـروبـه= ياخـادم البيتيـن . . وأبـو اليتـامـى !!
الشعـب مـن أقصـى الشمـال لجنوبـه= ومن شرقه لغربه . . يسـوق السلامـا !!
حـبـك زرعـتـه بالقـلـوب بعـذوبـه= نكبـر . . ويكبـر مثلـنـا ويتنـامـى !!
كن الوطـن جسـم . . ومكارمـك ثوبـه= وكن البلد دانـه . . وأنـت النشامـى !!
لـك سيـرة ٍ وسـط القلـوب محبـوبـه= تزهى منابيـت النفـل . . والخزامـى !!
ياعـاهـل ٍ لامــر فعـلـك لـقـوبـه= شي ٍ عـن أفعـال الجميـع أيتسامـى !!
يحسـب لمثلـك والأمــور محسـوبـه= والليا انتهت عنـدك يضييييـع الكلامـا !!
أخذتهـا مـن عقـب ماهـي بصعـوبـه= حتى غدت في يدك ( واحد جراما ) . . !!
منـك نتعلـم كـيـف للـذنـب تـوبـه= وكيف القلوب تضم . . عقب الخصامـا !!
ماغيـرك اللـي لــو كتبـنـا عيـوبـه= صـارت مزايـا تكسـب الاحتـرامـا !!
وأنتـه كسبـت الطيـب مليـاااااار نوبـه= ولـو عنـه عميـان القلـوب أتعامـى !!
يحفظك مـن سـوَى الهـواء والرطوبـه= اللـي لـه العاااااالـم صيـام ٍ قيامـا !!

لومات جابر ماتموت العروبة= تبقى .. ويبقى المجد بيدين اهلها
والعاهل اللي كانت ( اكبر عيوبه )= ان الامور اللي تشرف عملها
شيخ ٍ بنى مجد الكويت بصعوبة= حتى غدت دانة يثيرك خجلها
طفلة تعيش مع الجميع محبوبة= وترسم تفاصيل الجمال بغزلها
خمسين عام وكنه اليوم دوبه= من البداوة ... للحضارة نقلها
اليوم من اقصى الشمال لجنوبه= يبكي رحيل ابو البلاد وجملها
يادار جابر يامقر العذوبة= يامن مشاعرنا لها دووم ولهى
أميرك اللي راح مااحلى ذنوبه= داااام العروبة باهتمامه شملها
ماقال لي دار ٍ يكفي هبوبه= عن باقي البلدان .. لو ضاع املها
أمر العروبة صار له مثل ثوبه= واطماع عدوان العروبة قتلها
جابر وكم نجم الليا اقبل غروبه= عم الدمار بكل عين وخذلها
جابر لمن خان المبادي عقوبة= ياماااا قلوب ٍ في دهاءه شغلها
مامات جابر والشيوخ محسوبة= والعز باقي .. في بلاد ٍ حملها
من عقب ما ودع أمير ٍ ينوبه= واصل مسيره والشوارب فتلها

يسعد مسـاك . . ويسعـد الله صباحـك= ياللي بدونـك شمـس غاليـك ظلمـا !!
الله وهبك مع الحزن ( وجـه ضاحـك )= وعيون . . ( ليلة من جفا النور دلما ) !!
عاميـن ماهـبـت نسـايـم ريـاحـك= على خفـوق ٍ فيـه الأشـواق ولمـى !!
لامرهـا طيفـك . . وسيـرة جراحـك= مشاعري تاقف من الشوووووق بلمـا !!
أدري سـبـب مأساتـهـا وأرتيـاحـك= وأقـول زدنـي بالمعـانـاة علـمـا !!
أواه يامـحـلا وماأشـهـى قـراحـك= ووجناتك اللي فوقها ( يثمـل المـا ) !!
ودموعك . . وصمت العيـون ومزاحـك= اللي لهم بـالأرض ( أشـد ظلمـا ) !!
كـن السهـر قلـب ٍ يـدور رمـاحـك= كنه ( اجا ) وعيونك السود ( سلمى ) !!

الجـادل اللـي صيفـت فـي فيينـا= والعام في روما وقبلـه إباريـس !!
ماعـاد تعجبهـا مصايـف وطـنّـا= لو إنها . . أقصى طموح المفاليس !!
مالله كتب تسـأل مـن هنـاك عنّـا= وشلون تتركنا لنـار الوساويـس !!
الحال مـن عقـب المفـارق تدنّـى= مالي رفيق إلا كبـار الكوابيـس !!
أكتـب وجرحـي بالكتابـات غنّـى= أرقى الأغاني من شعور وأحاسيس !!
لوكان لـي بالحـب عـزم المثنـى= وإلا صبر أيوب وإلا أمرؤ القيـس !!
ماكـان عـود المـوز لامـن تثنّـى= ذكرني اللـي تستثيـر النسانيـس !!
ولاكـان غاليهـا ليـا مـن تمنـى= دعى لها رغم إختلاف المقاييـس !!
مابيـن قلـب ٍ بالوصـل ماتـأنـى= ومابين قلب ٍ أسس الهجر تأسيس !!
الله يعيـنـك ياخـفـوق المعـنـى= صيفت مابين الحزن والهواجيـس !!
الحـزن منّـا والهواجـيـس مـنّـا= وأنا أذكر الله وأتعوذ مـن أبليـس !!

ياعازف الحزن لاتعـزف علـى أوتـاري= أوتاري اصلا ً من الأحـزان معزوفـه !!
خذ باقـي الجـرح ودروبـي ومشـواري= وأجمع سنين العذاب .. وشتت طيوفـه !!
وإذا طواك الحنيـن .. وهـزك الطـاري= وأدركت معنى الغياب .. وحرقة ظروفه !!
إرجـع وتلقـى مكانـك داخـل أنظـاري= في عين ماكـل زول يمرهـا تشوفـه !!
وإن كـان ماهمـك غيابـي ولا أخبـاري= أحلامنا الباقيه .. أضرب بها الطوفـه !!
وأترك لـي الليـل معشوقـي وسمـاري= الليل من خلقته وأنـا أطيـب ضيوفـه !!
لقيـت فـي عتمتـه مايحفـظ أسـراري= ولقى بي الشاعر اللي ضيـع حروفـه !!
ماعمره الوصـل كـان إلـزام وأجبـاري= نهاية الغصب مثـل الشمـس معروفـه !!
ومصير قلب العنا ( غريب الأطـواري )= يمسح بقايا غلاك العـذب مـن جوفـه !!
جرح الهوى والحـزن والليـل وأشعـاري= وانت وتجافيك خمـس أشيـاء مألوفـه !!

لو كان لي قدرة على الصمـت مابحـت= لكـن غيابـك حـرك الشـوق فيـنـي
من يوم ولعـت النـدم فينـي ورحـت= ودعت صبـري .. قبـل أبيـح كنينـي
كـدرت قلـب اللـي يحبـك وفرحـت= قلـوب عذالـي .. ومستقصديـنـي !!
اللي يحسبون المواصل من ( السحـت )= أشغلهـم اللـي صـار بينـك وبيـنـي
ياما دمحت أخطـا بعضهـم وسامحـت= تأمرني اخلاقي .. ونفسـي .. ودينـي
أرقـى لفـوق وكيدهـم ينـزل لتحـت= كـن السمـا ترخـي يديهـا ليديـنـي
وإلا أنـت يـاورد ٍ بصـدري تفتحـت= يـازهـرة أيـامـي .. وياياسميـنـي
غلاك منحـوت ٍ علـى خافقـي نحـت= مايمسـح حروفـه عجـاج السنيـنـي
ليتك يا أصدق مـن عرفتـه تصفحـت= قصايـدي .. حتـى تحـس بحنيـنـي
وتشوف معها كيف من ( هامتي ) طحت= وأودعت عقلي معك وأعميت عيني

يامـل قلـبٍ لاتفـكـر بماضـيـه= عَود علـى روح العنـا وإستلمهـا
يالين تصبح جثـة ٍ مـن طواريـه= كنـه يصـور فرحتـه فـي آلمهـا
ليت الصبر ينباع بالمـال وأشريـه= وليت السعـاده فرصـة ٍ وأغتنمهـا
وليت الهنوف اللي تسوق المشاريـه= على ظروف ٍ ربهـا اللـي قسمهـا
ترحم خفـوق ٍ فيـه ماهـو مكفيـه= من قبل تومي به .. وتركز علمهـا
الله عطاها الملح والحسـن والتيـه= متكاملـه .. مـن راسهـا لاقدمهـا
تميت قلب اللـي عشقهـا وتحييـه= وتتجمد الكلمات في ( ثلـج فمهـا )
الليا أسألتني كيف مات الهوى و وليه= حديثهـا يرسـم معـالـم ندمـهـا
قمت أتشتـت قبـل ماأقـول لبيـه= بين العطور اللي تجي مـع نسمهـا
قلت الهوى مامات لو مات راعيـه= قصايده .. من نور وجهـك نظمهـا
كم له وهو يرسم خيالـك ويمحيـه= ولاهاضت أشواقـه بجوفـه كتمهـا
الناس ماتدري عن القلب وش فيـه= والنظرة .. تمـر الفطـن مافهمهـا
أدرا عليك مـن الخبـول المسافيـه= اللـي تبيـع بلامقابـل .. ذممهـا
يقـرون بعيونـي كـلام كتبتـيـه= قصة وفـا ليـل المـوادع رسمهـا
(( أنا أبيك وطاري البعد مـا أبيـه= مشاعري ماغيرك أحد ٍ حكمهـا ))

الشـارع اللـي دونهـا ليـه أمــره= يمكن ( إخطاي ) إن مرته ماتعـدي !!
مالـي وراه إلا الـنـدم والمـضـره= ولافيـه شـي ٍ يستحـق التحـدي !!
لـو كـان يـدري بالعتـب والتشـره= ماكان ضيعني .. ولا أنباح سـدي !!
لـه ذكريـات ٍ بالحـشـا مستـقـره= أقول ( أبنساهـا ) ولاهـوب ودي !!
لإنهـا (أرحـم ) مـن يديـن المبـره= ولإن ( سلطان الهـوى ) مستبـدي !!
والمره اللـي غيـر عـن كـل مـره= فيها ( إستلمت ) أحزان عمري بيدي !!
من ( جادل ٍ ) تحرق ( نجوم المجره )= كن الجمال يقول لي ( مين قـدي ) !!
وكن الحزن ( ليـل ٍ ) وراهـا تجـره= يبني من صروح الحنين .. ويهـدي !!
قلت : ( الغرام .. عروق قلبي ممره )= والحزن بأشواقـي يجيـب ويـودي !!
واللي ( عبثتيبه ) ( على حين غـره )= صاااابنه سهوم الهـوى ماأستعـدي !!
أمـا تعالـي ..( عاشقـة مستمـره )= ( أسطوووورة ٍ ) منها الحلا يُستمدي !!
وإلا ابـعـدي والـقـلـب ( لله دره )= ماهـو بأساليـب الجفـا مستجـدي !!
في داخله من ( لوعة الصـد ) حـره= وإنتي بكيفك ( تقبلـي أو تصـدي ) !!
تبسمت .. قلت ( الهوى راح شـره )= وأقفت وعيت عن سؤالـي تـردي !!

تعبـت مـن كثـر السهـر والتفاكـيـر= ليله ورى ليله . . وعـام ٍ ورى عـام !!
القلـب وأنهكتـه طــوال المشـاويـر= والعيـن ماعـادت تهنـى بـالأحـلام !!
ياصاحبـي مـاعـاد للـذنـب تبـريـر= العذر جاني . . والهوى سيد الأحكـام !!
وأوضاعنـا محتاجـه ( شـوي تغييـر )= يمكن يقـوم الحـظ وتطيـح الأوهـام !!
دايـم حكـايـات المحـبـة أساطـيـر= واللـي يميزهـا عـن الغـيـر الآلام !!
من عهد ( قيس بن الملوح ) إلى ( الزير )= والحـب متميـز بتحطيـم الأرقــام !!
يعلـم ( العاشـق ) فـنـون التعابـيـر= ويعلم ( المعشوقه ) ( فنون الإجـرام ) !!
وأنـا مابيـك تحـب مـن قلـب وتغيـر= أبيك . . ياسر الحزن . . عذب الانسام !!
تجـرب غيابـي ولاحـظ وش يصـيـر= وأنـا بجـرب غيبتـك طـول الأيـام !!
وإذا شعـرت ان الحـزن داخلـك غيـر= وقلبك تنهد هـم فـي صمـت وهيـام !!
وإشتاقت أسماعك لـ( تصبح على خير )= تعـال تلقانـي علـى خبـرك العـام !!
مغرم . . ولك بالقلـب حشمـة وتقديـر= وقلبي يقول مـن الولـه كـل ماهـام !!
( فرقـاك ياسـيَـد جمـيـع الغنـاديـر= ماتشبـه إلا العيـد بعيـون الأيتـام ) !!

باقـي مثـل ماأنتـه حبيبـي ولازلـت= غالي . . ولاغيرك من الناس غالـي !!
رغم الجفا اللي عـذب الـروح ماقلـت= إلا عسـاك بخيـر . . ياراسمالـي !!
اخفيـت جرحـي بالضميـر وتحملـت= فرقاك . . لوفرقاك فوووق إحتمالـي !!
وأنا بطبعـي لاكبـر حزنـي أشملـت= من قبل مااخسر لي رفيـق ٍ موالـي !!
سكت عن بعـض السوالـف وجاملـت= لاكدرت صفوي . . ولاضاق بالـي !!
ولو يحتـرق روض المعاليـق ماشلـت= هم الوصال . . الله يجيب الوصالـي !!
وشلون عاد الغالـي اللـي معـه نلـت= مكاسبـي بالحـب . . أول وتـالـي !!
ياللي على رجـم المشاعـر تطاولـت= وبنيت بيتـك فـي سفـوح الجبالـي !!
أكرمت مـن حطـك هـواه وتجملـت= في خافق ٍ ماهو من الحـزن خالـي !!
شفنـي إذا طـوّل غيابـك .. تسائلـت= (( معقول صدر اللي عشقته شمالي )) !!
وأنا أدري انك لك عـذر يـوم طولـت= لكـن خفوقـي بالصبـر مايبـالـي !!
والبارحـة فـي ذكريـاتـي تأمـلـت= فـي ليلـة ٍ ماهيـب مثـل الليالـي !!
لقيت فيهـا أكثـر مـن اللـي تخيلـت= حقيقـة ٍ تتعـب عقـول الرجـالـي !!
مـرت بـي أيـام الغـرام وتمثـلـت= أصدق هجوسي بالبيـوت الجزالـي !!