تعال خاويني على العز والطيب = وليا نويت لغيرها شوف غيري
انا سليل اهل الرماح المعاطيب = قوم ٍ يعزون الخوي والقصيري
ياللي تحسب انك رقيت المراقيب = اعلم ترى درب المعالي عسيري
ان كان مانت مكمِّلٍ للمواجيب = ولا انته من اللي ظلِّهم ما يغيري
مالك ومال المرجلة والمصاعيب = ارقد مع اللي يعشقون السريري
القدر ما يطبخ بليا مراكيب = والشمس ما تحجب بقطعة حريري
للطيب عد وللزعامة مطاليب = وياكم حرمها الله خلايق كثيري
وحنا ملكناها لك الله بلا ريب = من عهد سابق كاسبين الوفيري
حروب عشنا للمراجل مناديب = في مطلع الاجواد قومي تسيري
الوقت علمنا ولا نعلم الغيب = لكن ترى للرجل فكرٍ ينيري
نعرفك يالثعلب ولاننكر الذيب = وكلٍ على قد العمل له مصيري
نوفي رجال الطيب حشمة وترحيب = ترحيبةٍ معها تباشير خيري
حيلٍ تقلَّط في وجار المعازيب = والبن في المجلس بهيله يديري
هذا حسبنا مالنا عنه تجنيب = وكلٍ بحاله يالسنافي بصيري
وعندي نصيحة يمكن الله بها يثيب = للي يحب يعيش عيشة اميري
الطيش هو ساس الخطا والعذاريب = و قل الفهم عذروب ماهو صغيري
ومْشاحنك لاهلك وبغض الاقاريب = ينقّـــِص الرجَّــال لو هو كبيري
حافظ على دينك ونقّ الاصاحيب = وخذلك على أمورك دليل وشويري
ترى الحياة دروس ما هي ألاعيب = ولا بد ما تعطيك درس ٍ ينيري
وصلوا عدد ما تشرق الشمس وتغيب = على البشير المصطفى والنذيري

الأخ عبدالعزيز دخيل
ماشاءالله تبارك الله
دره من الدرر
بيض الله وجهك ابداااااع شاعر متمكن
لله درك
وصح الله لسانك
وحياك الله
تقبل اجمل التحايا
ودمت ودام تواجدك