اه من علة في داخل الجوف حلت = اوجعت واتعبت والجسم كله شكاها
اه ياشينها في الكبد غثت وعلت = كل عضو من الاعضاء يعاني قساها
يشتكي من لهدها حي فيه استحلت=حية تطحن والسم داخل حشاها
ان صبرنا عليهاالروح ضجت وملت= كثرة الصبر للعلة يزود بلاها
وان كشفنا غطاها العين بالدمع هلت= لابدت خلةِ في النفس تفرح عداها
كيف اسوي وانا روحي من الجهد كلت= واكثر الخوف من علم يبيح خفاها
انها المشكلة لاستفحلت واستهلت = بين الاقراب والاحباب دارت رحاها
فرقتهم وذلتهم لياما تولت = فوق قومِ ولاأحدِ ردها عن هواها
نار شبوا حطبها واحرقت ماتولت= تاكل اللي تولع له مع اللي وشاها
الشياطين تلعب والعوارف تخلت = والغشم ماتميز جودها من رداها
كان ماجا حكيم وذلها واستذلت= لاكبر حجمها ماعاد يُلحق مداها
الله انه يكافي شرها يوم طلت= حار فيها الطبيب ولانفعها دواها
عمت المجتمع في كل حي استدلت =كل دارِ وصلهاقسمها في حماها
احد لاجات داره صد عنها وزلت= والعبت لعبها وصلت معه منتهاها
واحد لاشافها هبت وشالت وخلت= يتبع اسبابها يالين يقطع رجاها
عاذنا الله منها كان كثرت وقلت=والشياطين يجعل كيدها في شواها
واحدوا من له الاكوان طاعت وذلت= كثر عد النجوم السارية في سماها
للنبي عد ماحجت جموعِ وصلت= رددوها صلاة ولحقوها دعاها