ياناشدن عن قصيدي وش بعد باقي = صار الفكر يامر الابيات وينهاها
اصبر شوية تحمًل بعض الاشواقي = ماكلً قصًه نبي نكتب خفاياها
لابدً من عود يغرز وسط الاعماقي = والنار تشعل وتدفا من زواياها
حطًيت بصمة قلم في بيض الاوراقي= محدن من الناس يقراها وينساها
ان كان غيري بمعنى القاف ماطاقي = من فضل ربي اصوبها بمرماها
بلساني اللي على القيفان ذوًاقي = والفكر يرسم خريطه زين ممشاها
وسط المجالس تداول بين عشًاقي = في مجلسن قيمة الاجواد بلحاها
ابيات تلقى الحكم فيها والاخلاقي = ياحض منهو نهار الضيق ينخاها
راعي الطرب لا سمعها صار مشتاقي = لحًن وغنًا ويفهمها بمعناها
وراعي الهوى في حلا الابيات ينساقي = هاجر حبيبه وصار اليوم يهواها
والجادل اللي تشيل الردف بالساقي = غارت وقالت قصيده مير محلاها
ترى المعاني مع الشعار ارزاقي = هذاك دوًر عليها وذاك يلقاها
الكون واسع وطيري فوق خفاقي = مايشرب البركة اللي قد شرب ماها
يموت ضامي ولايطلب من السًاقي = والنًسر ياكل من الجيفه وياطاها
ان طال غايب ابد ماخاطري ضاقي = هدهد سليمان جاب اخبار نقراها
والخاتمه عدً ماتشرق بالاشراقي = صلو على اللي جميع الناس ساواها