البنت تعشق كل فارس ورجّال=واهل المراجل تنعشق واتّشفّق
ولاتقول انا حبّيت قدّام لايحال=بينك وبين النّوم حاجز محقّق
والزّاد بعدك عنه يبري لك الحال=وان شاف حالك من يعزّك ترقّق
وحتّي يصيبك تالي الليل تجوال=اتجول كنّك ذيب يسري ملحّق
ويلومك اللي همّه ايلمّ الاموال=ولاّ بليدٍ يستهان ويصفّق
يضحك على حالك وينهاك بامثال=وانته فصدرك نار منها تحرّق
درب المحبّه غالباّ ذلّ واذلال=واللي تجنبها تراه الموفّق
وطبع الهوى يجمع متاهه وغربال=خذها من مجرّب قبل لاتعلّق
اللي لقيته فالهوى صعب ينقال=ولو ينحكى للنّاس صعبٍ يصدّق
اهوال مرّت بي تصيبك بالاهوال=شفت الخطر ماكنت اضنّه ينتّق
فيه المكايد والنّميمه بالانذال=اللي على نقل الخبر ماتوثّق
مابه مسرّه لو بدا يفرح آمال=فيه الاسى ظهر السّعاده ملزّق
ياقو حزنه لاحصل فيه ترحال=وشدّة عناه بوصل يصعب يحقّق
تقتل به الغيره وتدفعك لجدال=يالين ثوب الودّ منك ايتشقّق
من حرصك الزّايد على رغبة البال=يمكن تصرف بامر فيه اتّوهّق
وان حاش ودّك غيرك وراح يختال=برضاه ولاّ غصب اصبح مرفّق
يمكن تصرّف بامر ماهو لعقّال=فيه النّدم والدّمع منك ايتدفّق
هذي قصيده توجز الشّرح فالحال=والعلم فيها صدق ماهو ملفّق
وان طعتني لاتصير للودّ ميّال=واقسى على قلبك لاشفته تشفّق