سلام ردية وفا مضمونها عزوة وجاه =
منا على قن الصفا والساس مبني من صفاه =
فيه التحية ضافية لاهل الفرح واللي لفاه =
جينا نكمل في مواجيب الرجال الغانمين =
والثانية نرعي عواصف حولنا وصلت حماه =
من غرب قادت والخطر فيها يروع من رآه =
والخوف مابين اليمن والشام نقطة منتهاه =
العلم كايد ياعرب والله يكيد المغرضين =

يامرحبا طول المدى ترحيب صادق محتواه =
ثابي على طيب النبأ ساسه ولايختل بناه =
منا لكم ياربعنا واللي حضر والحفل جاه =
الله يحييكم لفيتوا فالكم سمن وسمين =
والثانية شفنا الخطر مرسوم عكس الاتجاه =
مشيه خفى والمنتظر بين العرب يجهل سراه =
وتبقى الجزيرة في آمان اللي بها بيته حماه =
الله يرد الكيد عنا في نحور الكايدين =

الاولة سلام يابيت ن عمار بناه رسمه =
فيه الزعيم اللي ليا منه وسم معروف وسمه =
جينا نكمل واجب اللي لا دعى محسوب قسمه =
انقولها والله يجمل من نوى درب الجميل =
والثانية وشهو رجل معروف عند الناس بأسمه =
يحكم به القاضي ويقنع به خصيمن ضد خصمه =
موجود في سوق العرب ويشارك المخلوق جسمه =
واللي يقول انا بحل اللغز هذا مستحيل =

يامرحبا ترحيب مثل النور يجلي كل عسمه =
باللي لفونا فالمحل مثل الحيا لا هل وسمه =
راع الوفا دسم السبال نقلطه دله ودسمه =
الله يحييكم على التكميل والمد الجزيل =
ياللي بنيت اللغز تلقى عندنا حله وحسمه =
هذا تراه الحق والميزان كل ن مايغشمه =
وألا تراه المتر لا ماصار بين الناس قسمه =
والمستحيلة ماتكلفنا كثير ولا قليل =

سلام ردية سوات الشمس ماهي كالقمر =
نور القمر خافت ليا جاك الطريق المعتبر =
يفرِح كما يفرِح هلول الخير لامنه سمر =
ننصابها قصر ن حصين اهله على الطالات منا =
حنا افتكرنا في بنية بيها فيها فجر =
البنت حبلى والأبو لمعنى الأبوه قد غدر =
والجار يسمع ليت مايسمع وشاهد مازجر =
حن الحجر من حالها والاخ يالعراف غنا =

يامرحبا ترحيبة ن تبدي على عز وقدر =
بضيوفنا اللي شرفوا بحضورهم حلة بشر =
جيتوا وجيتكم تسر القلب وتسر النظر =
واللي كماكم عادته وقت المواقف ماتونا =
والثانية ياللي من احوال البنية مفتِكر =
الله سبحانه على الظالم عزيز ن مقتدر =
والعود مقفي منتهي وضعه وحاله في خطر =
اصبر عليه ايام واخباره مع العالم تصلنا =

سلام ياقوم الفرح واللي في واجبكم لفا =
ياللي لكم بين العرب منزال باين ما اختفا =
راع الوفا يفخر بكم وانتم من اصحاب الوفا =
هذا كلام الصدق ياربعي ولايعاوز وثيقه =
والثانية جينا نبارك للعريس المحتفا =
الله يتمم له بخير ويجعل ايامه صفا =
واجب لكم ياربعنا وانتم رجال الموقفا =
مشاركتم فالفرح والحر مايضيع طريقه =

يامرحبا ترحيبة ن مثل الشهد ذوق وشفا =
بضيوفنا اللي قدرهم روس النوايف ماهفا =
ميقافكم دايم على روس الرجوم النايفا =
هذي حقيقة ثابتة ياللي تعدون الحقيقه =
الله يبارك في رجال ن فالوجوب تشرفا =
تتعب على قولة نعم ولا تحسب التكلفا =
عاداتكم ياهل الوفا والصدق واهل المعرفا =
ماتقطعون الوصل في يسر الزمن والا في ضيقه =