اسعد الله مساكم يارفيعين المقام = جيت ابارك واهني بالشهر خير الشهور
بارك الله بالعمل من صيام ومن قيام = ويرحم اللي توفو واسكنو تحت القبور
ياعسى يقبل علينا وعليكم كل عام = بالهنا والعافيه سالمين من الشرور
قلتها من لساني مير في قلبي كلام = المشاعر ضايعه مالقت نقطة عبور
من تغرًب بالوطن ماعرف طعم المنام = حالة اهل الشام بين الضحايا والكسور
ظنًتي افطارهم قنبله عقب الصًيام = واليتاما تشرب دموعها قبل السحور
والعرب مافرًقت بالحلال من الحرام = للفتاوي يحترون النًتايج للظًهور
مير دعوه صادقه للذي يكسي العظام = يرفع المسلم يده بالتًضَرًع للغفور
لايروح الوقت بين المسلسل والطًعام = ادعو المولى يحطًم سلاح اهل الفجور
ياعسى بعد الصًبر والصًبر مثل الظلام = نفرح بموت الافاعي ونضحك للنمور
قلتها يوم مدري وين اوجًه بالتًمام = جيت اهني وابارك واختلط حبل الامور
عين تبكي على اللي مساكنهم بالخيام = وعين تنظر على اللي مساكنهم بالقصور
وياصلاتي عدً ماعدًها راعي الختام = عالنبًي الهاشمي عدً ايًام العصور