ملتقى قبيلة حرب الرسمي

يابدر ياللي عليه بالدجى طلي=نار الهوى شوفتك زادت تلهبها
شفتك وحوّل غزير الدمع منهلي=من عبرةٍ شرهتي قامت تجاذبها
والقلب لولا ضلوعي جاك منتلي=والنفس الاشواق من شوفك تناهبها
لدّيت ملهوف كن الفكر منشلي=وازريت اسيطر على افكاري وارتبها
مذهول اطالع لوجهٍ بان متجلي=بالنافذه صوبي النظرات صوبها
يا من غرامه بداخل مهجتي حلي=ارفق بروحٍ عليك الشوق سالبها
لولاي اداري علىاسمك جيت لك كلي=لو دونك الناس تدحم في مناكبها
لوان دونك سيوفٍ حدب وتسلي=جيتك ولوهي تناهبني مضاربها
من دافع الوجد يوم انه تبيّن لي=وجهك خطير الوله للنفس يعطبها
حيثي بحبك بدون خيار متبلي=دبره والاقدار وال العرش كاتبها
حبك ملكني بجد وصار متولي=علي والروح شاربته وشاربها
مالي خيارٍ بنفسي معك ياخلي=والروح مني علا لاماك جالبها
ياكيف منك العنا يازين يحصل لي=وشلون ترضاه نفسك ماتعاتبها
خلك محلي وتدري ويش جارلي=من طول فرقاك واعذارٍ ترتبها
كودك تقدّر مدى جرحي وتفطن لي=وروحي بكثر التجاهل ماتعذبها
حيثك تجاهل معاناتي وتفتل لي=حبلٍ من الصد روحي فيه تشعبها
مانتب تراعي لامانٍ فيك يزهن لي=وشوق لوصلك عناه النفس غالبها
كنك بعد صرت احبك شلت لي غلّي=وبالبعد روحي على حبك تعاقبها
اليوم خامس شهر محسوبها زلي=عقب التقينا وانا باليوم حاسبها
مرّت عليه بـهمٍّ حل واحتلي=صدري وعيني كرى جفني محاربها
الياس من قرب وصلك منك بادٍ لي=حتى المواعيد شحّت بك مطالبها
تقول مثلك لمثلي بالهوى ملّي=وارخصتني عشرتي ما عاد ترغبها
والا بتعذيب من يهواك متسلي=ولوعات قلبٍ يودك تستلذبها
حكّم ضميرك وشوف لوضعنا حلّي=ونفسك على ما تسوي في حاسبها