كلفت في علم تنفيذه ماهوعادي=يلزمني البحث فيه ولاعنه صدّه
تحية مع دخون العود تنقادي =مني لبو فارس اللي صادق وده
طلبك يا صاحبي ياذخر الاجوادي = اذا قدرته بحيل الله ما ارده
الشاعر اللي ضعيف وحادر وادي=يكذب ويظلم ولاياقف على حده
يسب يمدح وهرجه تايه غادي = ويشوف نفسه وشوته خارج القده
يوجهه للمشاكل حظه الرادي=على المشاكل وظلم الناس وشحده
والثاني اللي براسه كبر وعنادي= جميع باب يجيه بفايده سده
توجهه للسنع ماهو بينقادي =تبني له البيت ويحسب انّك تهده
يصيح وينوح ويصفق مع النادي=وعن ضيعة الراي لوتنهاه ماترده
والشاعر اللي يقول النصح وينادي=ويكثر القول لوانه ماهو قده
واللي كلامه بعشقه غير متقادي =ماجا بباله قبل ما ينقده عده
كم شاعر لو طمع بالصيد ينصادي =وكم شاعر يعتبر من ينصحه ضده
الشعر يبغى الامين الصادق الهادي =ما هو بخمّة كلام هاته ووده
الشعر يحتاج له شاعر ونقادي =والنقد للشعر يكشف هزله وجده
واختم كلا مي بدهن العود والكادي=للي ليا مد مده يحسن المده