الله يامسرع الايام=كل يوم ننظر يجي بكره
أيام تمشي بنا قدام=لحد ما نوصل الحفره

اللي يسافر يبي له زاد=واللي بلا زاد مايقوى
تزودوا لآخر الميعاد=الآخرة زادها التقوى

مرت عليه ثمان أعوام=كل عام يزداد همي هم
والهم باقي معي قدام=والمشكله بين لحم ودم

مهما تمتعت باللي فات=بالمال والجاه والتقدير
ليا حضر هادم اللذات=ماينفعك غير فعل الخير

انصحك لاتحسب الراحه=والاكل والنوم والمشرب
القبر مافيه طراحه=والاخرة نارها تشتب

مهما تردد معاي الحال=اظل صابر على المكتوب
وارضي لو ان الهموم ثقال=لعلها ماحيات ذنوب

لاتنتظر رزقك من الغير=اسعى على رزقك لاتفتر
الله رزق سحابات الطير=والحوت بالبحر واهل البر

شبابنا فيهم القدرة=لكن ماهم كما الشياب
لان ماعندهم خبره=للمعرفه كلهم طلاب

مرت لنا شهور وسنيني=والموت مبعدك عن دربي
وان كان غيبك عن عيني=لازلت موجود في قلبي

ليه اتصل ماتجاوبني=والرقم باين بدون جدال
فيما مضى كنت تطلبني=واليوم ماتفتح الجوال

يحن قلبي إلى الماضي=اللي انتهى من ثمان سنين
لافي دعاوي ولا قاضي=مرناح مع ناس مرتاحين

تعبان جسمي وضغطي زاد=وسكري مرتفع بالدم
تركت كل الحلا بالزاد=لكنني ماتركت الهم

مهما تنامي الحسوس وزاد=لاشك يبقى الدوا موجود
المشكله نظرة الحساد=ماشي دوا للقلوب السود

يهل دمعي بدون حدود=لو ان الاعمار عند الله
سعيد يا أخر العنقود=عندك أمانه ياعبدالله

ياحظك اليوم من قدك=عسى السعادة عليك تزيد
سعيد اسمك واسم جدك=الله يهنيك باللي تريد

اللي عمل خير يلقى خير=والشر من يعمله يلقاه
الله مايقبل التقصير=كلأ على فعلته يجزاه

لاتحسب الموت متغيب=يحين بارادة الرحمن
ياكم اخذ عننا طيب=وكم ترك بيننا مرضان

باللي مضى كنت مايعتاز=واليوم عودت مجهولا
من بعد ماكنت بالممتاز=هبطت عندي إلى الاولى

بديت تخطي بدال تصيب=اثرك ياصاحبي مقلب
اللي مضى كنت اعدك ذيب=واليوم عندي كما الثعلب

واعدتني من ثمان شهور=واخلفت مرات ميعادك
واليوم ياصاحبي معذور=كثر المواعيد مافادك

العام بكيت ماجاني=واليوم ياليت زي العام
كل عام اسوا من الثاني=على كذا دورة الايام

مهما تزايد ظلام الليل=نور الفجر لاطلع يلغيه
وانا ظلامي بلا تبديل=شمس الضحى ماتاثر فيه

ابوع غلق بعد اسبوع=واشوفكم بالخطا راضين
مافيه من يفتح الموضوع=ويقول لاهل الخطا مخطين

بيني وبينك عقاب الله=الاخرة تنهي المشوار
اللي اخذ حقكم يلقاه= واللي ظلم ينكوي بالنار

صار المدرس بلا تقدير=الله يعينه على مابه
بالبيت مهتم بالتحضير=والمدرسه هم طلابه

اللي بلا واسطه مسكين=محل مايتجه مرفوض
واللي معه واسطه بالعين=محل مايتجه مفروض

تحتاج تدريس ياناقد=قدام رايك لنا تبديه
للعلم والمعرفه فاقد=وفاقد الشيء مايعطيه

يكثر الله من خيرك=ماعندنا بالنهايه شك
لو انها دامت لغيرك=اكيد ياخوي ماوصلتك

لو كان نهرج مع الاموات=واعلم ابوي ماجاني
ويعلم الربع مما فات=يقول شاركني اكفاني

ان جات زله من العدوان=اردها ماعلي اخلاف
لكنها ان جات من صدقان=اسكت ولو قيل لي خواف

بعد المرض عام غيبني=واصحابنا عودوا قسمين
البعض مايسلوا عني=والبعض في طبعهم وافين

الناس تبحث عن الحالي=وانا الحلا وسط دمي زاد
ياليت ما أورث عيالي=اللي ورثته من الاجداد

مرت ثلاثين من عمري=ماقدرن البيض يغوني
واليوم سلمت لك امري=سلمت لك كل ما مني

ليه تنكر من اللي صار=ياطاش ماطاش ياطايش
ماودنا نكشف الاسرار=السر من يعرفه عايش

غزيت قلبي بدون جدال=واستسلم القلب للغازي
واثبت انك من الابطال=ماقبلكم من غزا غازي

لياقة القلب تعبانه=لابد يبغالها تدريب
واللي تبنا على شانه=ايام يحضر وعام يغيب

يقلون لي من نسيك انساه=وشوف غيره يسر العين
مايعلمون انني اهواه=والقلب مايتسع لاثنين

ياعزوتي والرجا بالله=والرخص غلب على الغالي
وان عشت وان عاش عبدالله=لبدل المر بالحالي

لو قالو الزين مايكمل=انا حبيبي كمل معناه
في شوف عيني هو الاجمل=ماشفت بين العرب حلياه