عشرين زايد عشر مافيهن كلام = سويتهن لغوز للي يعشقون
1انشدك عن رجال عالي فالمقام = فالارض قدام البشر لايخلقون
روح سبايب رجل للكاين عدام = لاشك جابه شخص للي يطلبون
2انشدك عن عذرى تبي مرقد تنام = واهل البلد بقدومها يستبشرون
خلت كبار القوم وراحت لليتام = طاب المكان وطاب للي يسكنون
3انشدك عن رجلٍ فعل فعلٍ حرام= فعله حميه والعوارف يشهدون
يوم ازبنوه الناس في وقت القيام= فيها تعذر والخلايق يعذرون
4انشدك عن بنتن حكيمه ماتلام = صاحت لاهلها ياعساهم يسلمون
العلم واضح ماتبي تصبح حطام = ليش العوارف من خبرها يضحكون
5انشدك عن رجلين بحلول الضلام = مروعلى رجال جنده يحتمون
بالرمز جابو هرج والغايه ملام = لانس ولاهم جن عنهم خبرون
6انشدك عن عذرى صغيره ياسلام = وان كبرت العقال منها يزعلون
تفرض على العالم كثير الاحترام = ولاتنوزن فالوزن يالي تازنون
7انشدك عن رجال لناس الليام = الي تزيد بحال وحاله يتقصون
ماطولو سبايبه راحو عدام = هذا جزاهم فالعداله يمكرون
8انشدك عن عذرى غزت بنت الكرام= بنت الذي لا قال جنده يخدمون
جابت خبر مجهول للجاهل شمام = ذولا يفرحهم وذولا يحزنون
9انشدك عن رجال لناس النيام = مطلب لهم قدام لايستوطنون
رجال للورعان معناه الختام = خلاص بعده ناسهم مايسمحون
10انشدك عن رجال مايعرف نضام = ياخذ حلالك مايهمه وش تكون
لاشايلٍ بندق ولاشايل حسام = وش هالمصيبه ياجماعه علمون
11انشدك عن عذرى بعد ماتت قوام = جابت خبر مجهول للي يسالون
نص الخبر صحيح مافيه انقسام= عنه البشر مهما تحدو يعجزون
12انشدك عن بنتين ماتحويه زام = من يوم جتهن بنت طقتهن بهون
داون عليلن يشتكي كثر السقام = عود مثل ماكان واهله يفرحون
13انشدك عن ورعٍ صغيرٍ مايلام = توه مع الي فالشوارع يلعبون
صدر عليه الحكم والقاضي عدام= لاجل الذي وراه يمكن يشركون
14انشدك عن رجال للازم لزام = قبل الزمان يزين قله يملكون
عطاه للمحتاج من طبع الكرام = وناسٍ تعيي في جهنم يحشرون
15انشدك عن بنتين عاشن فالضلام= تالي زمنهن والنهايه يسلمون
ترى السبب معروف سبتهن غلام = لولاه مازعلن ولاهم يحزنون
16انشدك عن عذرى نهار الاحتدام = والناس فالمشهد حضورٍ ينضرون
جابت خبر صحيح لناضر قوام = بن الله الواحد وبه لاتشركون
17انشدك عن كلمه خفيفه بالكلام = تبدلت باسباب ناسٍ يمكرون
بعد الهناء راحو سبايبها حطام = هذا الجزاء والاخره مايرحمون
18انشدك عن عذرى مبانيها هدام = وشلون اهلها للخرايب يرجعون
سوال لاجله راح من صلى وصام = عمر الدهر مفقود يالي تحسبون
19انشدك عن عذرى لصاحبها علام = تعطي خبر مجهول للي يشرحون
اكثر مجي البنت فا الوقت الضلام = ناسٍ تبكيهم وناسٍ يضحكون
20انشدك عن عذرى عددها بالتمام = تسعين زايد عشر للي يحسبون
حكم الذي مايعتبر حكمه نضام = واهل الشريعه في مقاله يحكمون
21انشدك عن رجال لاحقه الملام = سبة خطا معروف للي يعلمون
حجة نبين ماتحجج باختصام = رده مقدر قبل ماحنا نكون
22انشدك عن عذرى هديه للمدام = هدية الحكام للي يحكمون
صارت رفيعة قدر والسبه غلام = سميها لديار غيره يرحلون
23انشدك عن حيٍ بلا خال وعمام = ولاهو من الي فالخلايق يالدون
ماذاق شرب ولاتهنا في طعام = ولاهو من خلق الله يالي تفهمون
24انشدك عن عذرى وتحضى باهتمام= في حبها بعض الاواد يفتنون
ياشين حظ البنت تالية الغرام = راحت مع الي فالمسالخ ينحرون
25انشدك عن رجال فالوصف التمام = يعني كثير المال للي يكنزون
مضرب مثل قدام لاتشكي سقام= حكمة مجرب والتجارب ينفعون
26انشدك عن بنتين سلم ياسلام = عن وصفهن يعجز كثير الواصفون
باسباب كبر وغطرسه راحن عدام = ياليت بعض الناس مايتكبرون