غاب القمر وأظلم بنا الليل ياسعود =والشمس والله يابن ابوي اتركتنا
عدن ليالينا بعد روحته سود=لارافقه فينا ولا راحمتنا
راح الأمير الي على الطيب والجود=يلمع سنا برقه ويضوي جهتنا
ريف الضعيف الي من الوقت مضهود=وريف الركاب الي تلد ونصتنا
واليا نخوه ولامس العود بالعود=يعدهم لو هم بعيد ... إلحمتنا
ياقف لهم كنه على شانهم طود=ياكبرها ياناس به فاجعتنا
منزهن عن كل عيب ومنقود=وعلومه اليا جات مافشلتنا
كنه على شان الجمالات مولود=متغذي الي بصيتها جملتنا
عمي رباح الي على اللين والكود=الناس من عرفه عليه اعرفتنا
كم واحدن روحّ ولاهو بمفقود=روحته ماهمت ولا روعتنا
ياليتهم راحوا بدل مهلك الذود=يرخص لضيفه لا لفاه ارقبتنا
لو انها ياعم بالمال وتعود=ماغابت عيونك ولافارقتنا
ياليتها مابين ملحن وبارود=كان إننا ياعم دونك ثبتنا
تاقف هل العرفا على شانك جنود=وترا العرب بفعلونا ماجهلتنا
لكنها غصبن ولاهو بمردود=أمر من الي قدرته خالقتنا
مافيه حي الا وبالموت موعود=حقن من الي حكمته حاكمتنا
والله يعين القلب لا ذعذع النود=والا الطواري لا طرت واجمعتنا
ابكي ويبكي من بكاي أزرق العود=عليك يالي روحتك موجعتنا
الله يجمعنا على الحق ياسعود=ولايفرح الشامت تشتت جهتنا
أنا أشهد انه عقب أسود وفهود=شوفتهم بوسط العزا صبرتنا
يالله مابابك عن الناس مسدود=أنت الكريم الي يدينه عطتنا
طالبك يالمعبود لا ياكل الدود=ذيك اليمين الي بها سامعتنا
وادخله بالفردوس ياحق معبود=واجب لنا الدعوه ونور جهتنا
عقب القمر ماغاب ياخالق الطود=والشمس يالخالق بعده اتركتنا
عدت ليالينا بعد روحته سود=يالله صبرنا على فاجعتنا

أخواني الأعزاء

صنت البدراني
سعد المحمدي
مريع العبيل
ومساعد الجليدي
رابح الجحدلي

صحت أبدانكم وجزاكم الله خير وشهداتكم لقصيدتي وسام على صدري

شرفني مروركم العطر