الا يالله انك لاتخيب رجال الدين=وتعز الرجال اللي توارث مناصبها
وعسى الله يعزك يابلد خادم البيتين=بك الأمن والخيرات تتعب محسبها
وياكثر الكوارث حاصله بعد عام الفين=وعام اربعه ياكثر روس مشيبها
اقوله بعد كيفت راسي بفنجالين=من الدله اللي مجلسي عند عاقبها
ولا يا هجوس الشعر وش عاد تستنين= يا طيب الهجوس اللي تحضر لواجبها
انا ماعليه خوف لاقامت الصفين=معي هاجس لو هي بعيده يقربها
واقول القصايد وافتخر بالكلام الزين=واداري شعور الناس وادارى عواقبها
وكلمه لها وجهه وكلمه على وجهين=ولا اقولها في موقف ما يناسبها
وانا ربعي الحصنان ربع تسد الدين=هل العزوه اللي كلمة النعم تكسبها
هل الطيب والترجيب وقت القسا واللين=وهل السيف الاجرب كان شبت شبايبها
من العود الاول وارثينه الى هالحين=قلوب العدا شوفه من بعيد يرهبها
لنا ذروة التاريخ ومحصنه تحصين=ولنا سمعةٍ بين القبايل نفوز بها
رياجيل هيبتنا تهز اليمن والصين=وتدري بها ناس طوال شواربها
وعلى الارض طول وعرض يامكثر الوافين=وياكثر الرجال اللي عزيزه مناسبها
عن المختلس وين انت يالسيف ابو حدين=مادام العداله سايده ويش يحجبها
هذا مختصر واسبابه الوعل أبو قرنين = بجنب الجبل شفته قرونه يلاعبها
يقول الجبل من حد قرني يروح طحين = وانا اقول قرنك فوق راسك وجربها
ياراع الذلول اللي عليها السفايف وين= علومٍ معك مدري منين انت جايبها
ترى ابليس حي ويضرب الجمع بالجمعين= وترى الأرض بعد السيل تطلع عقاربها
أقوله ولا تجهل كلامي يابو قلبين =لا تمشى توال النار لينك تطيح بها
ترى طلقت المدفع تخل الهدف قسمين= ماهي بندق مضرابها عند شاربها
تبي تجيك لكن الله أعلم تجيك منين= ترى الحرب خدعة والظروف وسبايبها
حقوق العرب ماهي بحبحب على السكين= لو انك تهرب منت قادر تهربها
وترى الهرج واجد والرياجيل متعافين= وترى نجد وقت الصيف تكثر هبايبها
وترى ماهي أخر معركة معركة حطين=بعدها معارك شرق الأرض ومغاربها