تغنيك عن مد اليدين الشحيحه
 

.
.
.
.
.
.
.
.
.
(((((((((هذه قصيده من قصايدي أرجو ان تنال إعجابكم))))))

مدت كريم القوم لوكان فقران
تغنيك عن مد اليدين الشحيحه
اللي يقدر زايره كان ماكان
وليانصاه الضيف جاب الذبيحه
فعله فعول اللي طويلين الايمان
على السلوم الطيبه والسميحه
والله لوتكتب لطاريه ديوان
ماظن بالديوان تبلغ مديحه
لكن بلاك اللي بلا طنب واركان
اللي لا جا الواجب علومه قبيحة
ماهو كفو للضيف صكاك بيبان
ياشين ريحانه وياشين ريحه
ياباذل المجهود وعلومك سمان
اترك هزيل القول واسمع صريحه
الله امر بآيات ونصوص قران
تنزيل قوله بالحروف الفصيحه
قال اجتهد للضيف واجزيه بإحسان
واللي يطيع الله ربي يريحه
اريحه يكفيه من مس نيران
ويدخله فجنان خضرا فسيحه
وانا على ماقلت نصبت ميزان
قارنت بين الواقفه والطريحه
الواقفه عند الخلايق لها شان
والطايحه للي كسبها فضيحه
هذا كلامي يوم قلته. إبرهان
والهرج بالمدلول يكفي صحيحه
وان كان فيما قلت زله ونقصان
ماهو غلط ولو جات منكم نصيحه
وختامها صلوا عدد غر الامزان
على النبي وإعداد ليل وصبيحه
وعداد ما ينبت من الارض ريحان
وإعداد ماتبرى القلوب الجريحة

اللهم صلي وسلم على سيدنا محمد
صح لسانك ماقصرت وافة الشح والبخل
مرض نفسي عند كثير من العباد يقضي
على جميع المكارم وصاحبه نسال الله السلامه
منحصر عقله ونظره وقلبه وجوارحه على المال فقط
نسال الله لهم الشفاء

اللهم صل وسلم على سيدنا محمد
صح السانك لاهنت
ولاهان منطوقك

نص راقي لاشك

عفيّه عليك ياعصام
والله يغنيك من واسع فضله وحفظ لك الله موهبتك
وصح لسانك
على القصيده الجزله اللي هي من عاداتك