لو الوفا بالوفا مكفـول=لاوفي قليل الوفى وانسى
مير الزمن ياقليل الحول=حط السطى للعطى مرسى

من يوم ماجفيتني يافـلان=كـل الاحاسيـس منشـده
حتى البلا صار في الاجفان=ماحدٍ عطى صاحبـه وده

لك فالحنايا زهر فوّاح=يفوح لاجيت في بالي
يامالك الروح كيف ارتاح=وانته بذا الهجر ياغالي

دورت لك في ثنايا الامـس=سقيا تخفـف ظمـا الليلـه
حتى وصلت لغروب الشمس=ماسعفني الشوق من حيلـه

ياكـم نصحتـك ولكنّـك=درب الصفى ماشيٍ دونه
تشكي العنى والعنى منّك=تعزف على اوتار مجنونه

لا صار ما يسر مايصيبك=مافيك ياصاحبي نقصـان
هي ريح الاقدار تسريبك=في عكس ماتشتهي احيان

من كان جاير على ربعـه=وماحْسب حساب اللحم والدم
لايحتري للصفـى رجعـه=ماعقّبـه جـرح مايلـتـم

لاذقت من مر يومك كـاس=وارخى عليك العنى ستاره
ليه التفافك وطاري الياس؟؟=مــادام الايـــام دوّاره

ابحرت ومقصودي بلاده=واليا تصافق بي الامواج
ومن يقدر الود ياساده؟!=لامن تمادى بحرْه وهاج

لك شوق ماكب مطلاعـه=دايـم ولـه فالليالـي دور
حتّى غدى معاير الساعـه=لحظة غروب الاصيل يثور