وضعي تردى والقهر عقّب اجروح= والناس في وضعي قالت وقالت
اصارع العبرات وآون وآنوح= مليت ضيم ومدة الصبر طالت
والعبره اللي ترجمة ضيقت الروح= داريتها داريتها وستحالت
والعين تنظر للفرح بارق يلوح= تنظر فرج وقت ِ به الناس مالت
عن النوم واوطانه لها طرف منزوح= مابينهم كثر المعاناه حالت
كثر الأسى ياناس مجبرني ابوح= مايلام حر ٍ منه الايام نالت
ببيات شعري يظهر الوضع مشروح= عما جرالي في سنين ِ توالت

اطلب الغفران فالشهر الكريم = واترك الأشعار واجلس فالحرم
احذر الشيطان يوصلك الجحيم = ذي نصيحه حجمها كبر الهرم
طاوع العقّال وافهم يافهيم = واعتبر فاللي جرى لعاد أو إرم
واسأل الرحمه من الرب الرحيم = طالب الرحمن يبشر بالكرم

به ضيف ناصيكم قريبه حراويه = ضيف ٍ كريم وزاد بالخير جوده
ملزوم يابن ادم ترحب وتقريه = كبش الذنوب اللي متينه عضوده
سكين توبه في يدينك تذكيه = وبالحمد والتهليل تصلخ جلوده
ثم قسمه بقدور مذنب وغطيه = والنار من صدرك تكثر وقوده
وافرد سفر في ليلة القدر عشيه = تلقى عواقبها تجيك محموده
واليا سرا في ليلة العيد تبكيه = واطلب من الله كل عام ٍ يعوده
ضيف السعد والخير حذرك تخليه = شهر العتق والمغفره والمفوده
اللي به الشيطان مخزي واهاليه = مصفّده فيها الحبال معقوده
هذي نصيحة شخص صاين مباديه = والعاقل اللي مايربّح حسوده
والاجر مادوره من الناس وارجيه = القاه عند اللي تسبح رعوده

ازكى تحيه عطرت باطيب انفاس= تاصل يابن قحطان موقع بريدك
تحمل عبير الورد مع كل نسناس= من معجب ٍ مشتاق يقرا جديدك
وش غيبك يابو محمد عن الناس = ناس ٍ ذبحها الشوق تسمع قصيدك
ياشاعر ٍ دونت في صحف الالماس = من الذهب ابيات خطة بإيدك
شعرك مترجم حس عن كل حساس= صغت المعاني لاعدمنا مفيدك
وايضا ًمزج للناس حكمه ونوماس= دايم وجمهورك يدور مزيدك
اسمك غدا للشعر معلم ونبراس= واليوم بنكه فايض ٍ به رصيدك
مثل البحر عمقه من الصعب ينقاس= ياقع بموجك من يحاول يكيدك
حتى الفخر في شخصكم رافع الراس = في ساحة الشعار شعرك عضيدك
عساك في دنياك متواجه افلاس= ويالله عسى ايامك كما يوم عيدك
واختم وصلي عد من زار تكساس = على احمد المعصوم سيدي وسيدك

كتبت خطـي للوجيـه المسافيـر= في منتدى فيه المعانـي مصونـه
للعزوه اللي كـل ابوهـا مناعيـر = بين العرب نوماسهـم يذكرونـه
بالمحفل اللي تابعـوه الجماهيـر= سفيركـم بالشعـر لاتتركـونـه
شاعر يمثلنا وحنـا لـه انصيـر = سيفه وريفـه وانبغانـا عيونـه
حيثه ولد عم ٍ ولا فيـه تقصيـر = لـه واجـب ٍ ياربعنـا تدعمونـه
شعره جمع مابين حكمه وتصويـر = والقاف ياتيلـه برغبـة لحونـه
محفوظ له بالقلب حشمه وتقديـر = نجمع عزيز المـال نفنيـه دونـه
والوضع مايقبل تـروي وتفكيـر = والراس عزه دايما ً فـي متونـه
وان رحت يااحمد وعتليت المنابير = اهدم جسور الخوف واهدم حصونه
بس اتكـل باللـي عليـه التدابـيـر = ومن اتكل بالله صابـت ضنونـه
عساك في دنياك تمشـي بتيسيـر = وتبقى زبون الخير تبقى زبونـه
خطي وصلكم يالوجيـه المسافيـر = والله مع اللي ساعـي ٍ بالمعونـه

ياالله ياللي كل مضيوم ينصاه = ياواحدٍ بامره تزول المصايب
ياللي صفاته كلها اطابق اسماه = واحد يسبح له شجر مع هبايب
ياموعدٍ في جابته من ترجاه = ويغفر ذنوب اللي عن الذنب تايب
لك عبد قد فارق حياته ودنياه = من بعد ما واجه ضروف ٍ صعايب
ياالله نور قبره اللي تغطاه = ولاتجعله في ضيق تحت النصايب
وجعل مصيره جنة الخلد مثواه = ولا ينخزي في يوم نشر الكتايب
وليا جمعت الناس في يوم نخشاه= اجعله المصحف سواة السحايب
وبصبر ثبت شخص ٍ اليوم ينعاه = قلبه من الفرقا جروحه عطايب
دنياك ياسالم له طبع مقساه = كم فرقت مابين قلب وحبايب
والعبد يمشي تحت تدبير مولاه = والله عليم بكل حاضر وغايب
وما خطلك باللوح ملزوم تلقاه= واللي تعدى عنك ماهو بصايب
بالملتقى حزن ٍ تعمم على اعضاه = نحزن لحزنك ياعريب النسايب
وندعي له الرحمن وانقول ياالله = تكفيه ياربي سعير الهايب
والله يعين اللي تأثر بفرقاه = وبلغ تعازينا جميع القرايب

مجرح شعور الناس مااتحاقر الناس= طبيعيتي من يوم ربي خلقني
حساس واتعامل مع الناس باحساس= والله من امراض التغطرس عتقني
امشي مع الطيب ولا اخاوي انجاس= والصدق من عمر الطفوله عشقني
واوزع البسمه وانا اواجه الباس= اكتم همومي لو زماني سحقني
مشكي على مخلوق لو عشت بافلاس= اشكي على اللي بالتوكل رزقني
والجاهل اللي دق للشر مرواس= عنه اتغاضا لو بشره لحقني
ابحث عن اللي فيه مفخر ونوماس= وحبل المراجل بالوراثه وثقني
ولا اقبل علي الليل في ظلم ودماس= والوقت في نار المأسي حرقني
اللقا سلايه بين حبر ٍ وقرطاس= لاقمت اعبر عن عذاب ٍ عمقني
اسري بهوجاس ٍ واعود بهوجاس= عن واقعي شعري ابد ماسرقني
ولا اسب في شعري ولا اعادي الناس= يشهد على ماقول رب ٍ خلقني

رح جدد الاوتار مع ريشة العود = ووزنها يافواز وزنة شمالي
ناخذلنا ليله كما كان معهود = ليله تعيد امجاد ذيك الليالي
جلسه بها شرواك ماتجيب منقود = ياصاحب ٍ نغليك فوق الخيالي
وانجيب ابوغانم وصاحبه ابو جود=واحمد رجا مخبور راع الكمالي
ولافي ولد حامد إلى صار موجود = ويحضر معه اللي يناديك خالي
وصاحبك ابو خالد به الطيب مشهود=ولاطيع فمساعد كلام ٍ يقالي
مليت يافواز انا هجر وصدود= من صاحب ٍ عامين قاطع وصالي
شخص ٍ هجر عنا ولااضنه يعود=اقفى وخلاني وحيد ٍ لحالي
نبغى الطرب يحلى على ريشة العود=في جلسة ٍ تجمع قروم الرجالي

ماجور ياسالم وماصار مكتوب = وامر ٍ مقدر مالكم فيه حيله
واصبر على غلبك ليا صرت منكوب= لاواهني من كان ربه وكيله
وانا اطلب اللي منشي الشهد من نوب= الواحد القهار مزبن دخيله
اللي فرج كربه عن العبد أيوب = يفرج همومك بين يوم ٍ وليله
ومن اتكل بالله ماهو بمغلوب= يلقى التوالي بالمسره تجيله
وياعين لاتبكين من بعد محبوب = غير الدعا ياعين مالك وسيله
قولي عسى الغالي عن النار محجوب = وعسى حسناته في ميزانه ثقيله
ويحشر مع اللي فوقهم اخضر الثوب = والروح في جنات عدن ٍ نزيله
وحسن ضن العبد بالرب مطلوب = لنه وعد في جابته من لجي له

يوم الهنا والسعد ذا يومنـا غيـر = يوم الوطن نجم السعد في سماهـا
بارض القداسه لاكنيسه ولا ديـر = ارض ٍ من التضليل ربـي حماهـا
هيا افرحي يادولتي فالـك الخيـر = فرحة عروس ٍ تفتخر في بهاهـا
وحنا على فرحك نبي نلعب الزيـر = ياديـرة ٍ بالقلـب زايـد غلاهـا
لو تحسدك حساد ماتعطل السيـر = الخير ماشي واحتـرق ياحشاهـا
حنا جذبنا العذب من جمـة البيـر = في ظـل حكـام ٍ تقـدر لحاهـا
آل السعود اللي على غير تقصيـر = قادوا مسيرة مجد مابـه سواهـا
من فارس ٍ ورث لهم خير تدبيـر = العـدل والحكمـه بكفـه هداهـا
اسس لهم منهج علوم المناعيـر= اللي رسم دربـه وحـدد خطاهـا
ومشيوا على دربه ويزيدون تطوير = والعلم عم الحاضره مـع قراهـا
وحنا مع اهل العدل ناقف طوابيـر= من دونها ناقف ونمشـي معاهـا
وانجدد البيعه من عصير لعصيـر= منا لبـو متعـب ونعلـن ولاهـا