بالهون يا مشتري ثوبك=منته من اللي يخيطونـه
جيش العدو متجه صوبك=الحقد والشـر فعيونـه
بعض القضا نوبي ونوبك=ياداعي واللي يديرونـه
لو ترقد القوم عاثوابـك=والجيب يزري من ديونه
وراك كشـرت بنيابـك=وانته مكانتك مصيونـه
لولا قبيلتك مـا هابـك=حربي انا اموت من دونه
لو تزهم أجناب ماثابـك=غير اللي شاريك بعيونه
كب التعصب مهوبابـك=غيث الحيا الناس يلفونه
للنـاس نمدحـك فغيـابـك=وانتـه بنادقـك مـوزونـه
ما تقول وش جاك وش صابك=الطيـب قفـلـت كالـونـه

سلام مخصـوص ومعمـم=وموسقه علم وأنـا أقفـاه
فـي مـد ممـدود ومتمـم=ما أدري عسى تم وألا أنساه
ترحيب مظروف ومختـم=خوفي من الواشية تقراه
عن بعض الاخبار ما نعلم=أما الوفاء كلنـا نحمـاه

ترحيب من قلب بيضاني=لاهل الصفا والعقل والحلم
تو الشعر عندنـا زانـي=وبقدومكـم الكـلام يتـم
عسى البقا صقر شيهاني=عساك يا صاحبي تسلـم
جينا على حسب الأقناني=واللي على سبلها ما أهتم
جينا للأصحاب بلعانـي=لأجل الوفا والصفا والعلم
مير البقـا أول وثانـي=يضفى على المنتدى ويعم

سـلام مـن حقـنـا ردة=وفي سنة المصطفى واجب
نعناع طيبة وصـل جـدة=واهل القرى حظهم طايب
جده بها كـل ماتـوده=والكل فاحضانها راغب
واللي سكن فالقرى حده=مايهمهم وش بدا غايب

يا كم جابت لنا الايـام=كلمة مع الناس تنقلهـا
ان شلتها تعقب الاسقام=لا بد على الخير نحملها
يامرحبا والكلام أقسـام=وكل على حسب ظاهرها
وأنتم وحنا رجال حشام=والناس تنزل منازلهـا